Ձենս 50 տարի առաջ տվել եմ Նորիկին, Կարենի սիրունությունը ընձի ի՞նչ. ու՞մ են ցանկանում ԱԺ-ում տեսնել գյումրեցի կանայք

Որոշ ժամանակ առաջ Հայաստանի կառավարող Հանրապետական կուսակցությունը ոչ պաշտոնական մի զավեշտալի տեղեկատվություն տարածեց, թե՝ հայ կանանց 80 տոկոսը «գժվում» է ՀՀ վարչապետ, ՀՀԿ առաջին փոխնախագահ Կարեն Կարապետյանի համար:

Շատերի համար այդպես էլ անհայտ մնաց, թե այդ 80 տոկոսի կարծիքը ինչպես համատեղվեց: Ինչեւէ, մեր հարցման ընթացքում փորձեցինք գյումրեցի կանանցից եւ աղջիկներից հետաքրքրվել, թե առաջիկայում ձեւավորվող խորհրդարանում ու՞մ կցանկանային տեսնել: Հարցրեցինք նաեւ, թե հանուն վարչապետի ՀՀԿ-ի օգտին քվե կտան, թե՝ ոչ:

«Ես այդպես էլ չհասկացա, թե՝ ո՞վ է այդ հարցումը արել, որտե՞ղ է արել, քանի՞ հոգու են հարցը ուղղել, որ հիմա էլ հայտարարում են, որ հայ կանանց 80 տոկոսը վարչապետին սիրում է: Ասենք՝ մի կին նրա քարոզարշավի ժամանակ ասեց, որ սիրուն տղամարդ է, դա նշանակում է, որ բոլորը իրե՞ն են սիրում: Չեմ կարծում, որ նրա արտաքին տեսքի համար կարելի է ՀՀԿ-ին ձայն տալ»,- համարձակ նշեց գյումրեցի երիտասարդ կանանցից մեկը:

«Եսիմ, չեմ կարող ասել, վարչապետը սիրուն է»,- լսեցինք նաեւ այսպիսի կարծիք, որը թեեւ միակն էր՝ մի քանի տասնյակ կարծիքների մեջ:

Գյումրեցի կանայք, ովքեր կարծիքներ հայտնելուց անվախ են՝ նշեցին, որ Հայաստանին հզոր ազգային ժողովի նախագահ է անհրաժեշտ:

«Մեզ պետք է վախ չունեցող խորհրդարանի նախագահ: Ես այդ թեկնածուին տեսնում եմ Ծառուկյանի կամ Փաշինյանի մեջ: Ընչի՞, հայ կանայք սիրուն հագնված տղամարդ չէի՞ն տեսել, որ վարչապետի համար գժվեն: Նա լրիվ շոու է անում: Ես իր ոչ մի խոսքին չեմ հավատում: Մի օր էլ կթողնի, կգնա»,- ասաց գեղեցկության սրահի աշխատակցուհիներից մեկը:

46 տոկոս աղքատություն եւ 3500 անօթեւան բնակիչ ունեցող քաղաքի կանայք առավել իրատեսական են: Նրանց հնարավոր չէ գերել կամ խաբել հայկական Ալեն Դելենով:

«Այն, որ Կարեն Կարապետյանը ցանկալի տղամարդ է՝ չեմ ժխտում, բայց հանուն նրա երբեք ՀՀԿ-ին ձայն չեմ տա: Սերժ Սարգսյանը մեզ թալանել է, ես իրեն ինչու՞ հանուն վարչապետի ձայն տամ: Այդպես որ վերցնենք, բոլոր կուսակցություններում էլ սիրուն տղամարդիկ կան՝ ի՞նչ անենք: Ազգային ժողով թող Ծառուկյանը մտնի, որ գործի տեղ բացի, Օհանյանը մտնի, որ բանակը հզորացնի: Մեր առաջին նախագահն էլ էր ինձ դուր գալիս, բայց վերջին օրերին ինձ թվում է, որ Սերժի կողմից է»,- նշեց «Շիրակ» պետական համալսարանի դասախոսներից մեկը:

«Ես իմ ընտրությունը 50 տարի առաջ եմ կատարել, ձենս տվել եմ Նորիկին, Կարենի սիրունությունը ընձի ի՞նչ: Տատս կըսեր՝ սիրունի դեմքին փլավ չեն ուտե: Արեք, ըսենք վարչապետը սիրուն է ու սոված-ծարավ ման գանք: Ծառուկյանը ասում է 25 հազարով թոշակ կավելացնեմ, միլիարդներ կբերեմ, թողեք գա, բերի էլի»,- ասաց գյումրեցի կանանցից մեկը:

Վարչապետի արտաքինով, տարատեսակ զգեստներով, հայացքով, քայլվածքով եւ պիջակը աջ ու ձախ ուսին գցելով՝ ՀՀԿ-ին, մասնավորապես Գյումրիում, չի հաջողվել շեղել կանանց ուշադրությունը: Այստեղ կարեւորում են իրատեսական նախընտրական ծրագրերը, որոնք փոքր-ինչ շանս ունեն ապրիլի 2-ից հետո իրականություն դառնալու համար:

Երիտասարդ մայրերին հատկապես հետաքրքում է Օհանյան-Րաֆֆի-Օսկանյան դաշինքի՝ նորածիններին տրվող միանվագ նպաստի նոր առաջարկությունները: Նրանցից մի քանիսը մեզ հետ զրույցում նշեցին, որ այդ պարագայում կկարողանան իրենց երեխաների համար բարեկեցիկ մանկություն ապահովել:

Դավիթ Գասպարյան

Գյումրի