ՔՊ-ի նոր շքեղ գրասենյակը եւ անհասկանալի արձագանքը

 Երեւանի էլիտար շենքերից մեկում, Սայաթ-Նովա փողոցի վրա հայտնվել է «Քաղաքացիական պայմանագիր» կուսակցության գրասենյակը: Top-News.am-ը, որը ղեկավարում եմ ես, իր ընթերցողներին տեղեկացրեց այս մասին: Բնականաբար, այս թեմային կրկին չէինք անդրադառնա, եթե չլիներ կառավարող ուժի ներկայացուցիչների անհասկանալի եւ անտրամաբանական սուր ռեակցիան:

Ռեակցիան ակնհայտ ուղղորդվող էր ու այնքան սուր, որ ես մի քանի անգամ կարդացի մեր իսկ հրապարակումը, հասկանալու համար, թե որն է « ցասման» պատճառը: Գուցե սուր ռեակցիայի պատճառը Գագիկ Խաչատրյանի անվան հիշատակո՞ւմն է, բայց մենք ընդամենը նշել ենք, որ համառ լուրեր են շրջանառվում, որ շենքը պատկանում է հենց նրան: Ենթադրենք շենքը պատկանում է ոչ թե նրան, այլ Խաչատուր Գագիկյանին: Չէ որ դրանից հարցի էությունը չի փոխվում: Միեւնույնն է, մեծադիր ցուցապաստառը՝ «Քաղաքացիական պայմանագիր կուսակցության գրասենյակ» մնում է:

Իսկ նրա անմիջական հարեւաններն են «Յուքոմի» գլխավոր գրասենյակը, որը կրկին կապվում է նույն Գագիկ Խաչատրյանի հետ, այնտեղ է գտնվում «Մեգասպորտը», որը եւս կապվում է Գագիկ Խաչատրյանի հետ («Հայկական ժամանակը» եւս պնդում էր, որ «Մեգասպորտը» Գագիկ Խաչատրյանինն է):

Գուցե սուր ռեակցիայի պատճառը նույն այս հրապարակմանը Էդմոն Մարուքյանի անդրադա՞րձն էր: Ամեն դեպքում, ՔՊ-ականների արձագանքը տարօրինակ էր: Պատահական չէ, որ Մարուքյանի կուսակցից, ԱԺ պատգամավոր Անի Սամսոնյանը ստիպված ՔՊ-ականներին հուշեց. «Էդմոն Մարուքյանը ընդամենը հարցադրում է անում, որին պետք է շատ պարզ պատասխանել՝ հրապարակելով վարձակալության պայմանագիրը...»։

Ընդամենը պետք է ասել, թե վերոհիշյալ տարածքը ՔՊ-ն գնել է, թե վարձակալել եւ ինչ պայմաններով: Ընդամենը, իսկ մնացածը մանիպուլյացիա է:

Հիմա իմ կայքի դեմ ռեակցիայի մասին։ Ոչ մի խնդիր՝ սուր, չափից ավելի սուր արձագանքների , քննադատությունների մասով։ Բայց ցավալի է, երբ էթիկայի կանոններ են խախտում, ոտնատակ տալիս Հայաստանում չգրված եւ գրված օրենքները, միասին անցած ճանապարհը։ Երբ ՔՊ-ական ԱԺ պատգամավորը որոշում է ի լուր աշխարհի վիրավորել ինձ, էժան ձեւակերպումենրով, պարզապես ուզում ես ասել՝ քեզ ինչ եղավ:

Մի՞թե դու այն երիտասարդը չես, որի արժանապատվությունը երկար տարիներ բոլորի աչքի առաջ պարբերաբար ոտնահարվում էր եւ հենց գործող վարչապետի կողմից: Եւ եթե նույնիսկ քո ծննդյան օրն էլ հռչակվի քաղաքացու օր, դու դրանից չես շահի։ Ի՞նչ կեղծիքի տարածման մասին ես խոսում: Ի՞նչն է կեղծիք, այն, որ էլիտար շենքի մի հսկա հատվածում ՔՊ-ն գրասենյակ է բացել, թե՞ որ մենք տեսնում ենք հսկա ցուցանակը:

Գեղամ Նազարյան

Top-News.am