Եթե չլիներ արտակարգ դրությունը

Այսօր ՀՀ երկրորդ նախագահ Ռոբերտ Քոչարյանին փորձում են մեղադրել 2008թ. մարտի 1-ին արտակարգ դրություն մտցենու համար: Փորձում են այնպիսի տպավորություն ստեղծել, որ եթե չլիներ արտակարգ դրությունը, ապա չէր լինի նաեւ ողբերգությունը, արյունահեղությունը:

Պետք է համարձակություն ունենալ, պետք է ազնվություն ունենալ եւ ասել, որ եթե չլիներ արտակարգ դրությունը, ապա զոհերի թիվը ավելի շատ կլիներ: Տարիների հեռվից արդեն սա ավելի քան ակնհայտ է:

Ավելին, անգամ Ռոբերտ Քոչարյանին կարելի է քննադատել արտակարգ դրությունն ավելի շու չմցնելու համար: Ի վերջո մարտի 1-ի դեպքերի մասնակիցները կարող են վկայել, որ ինչ որ պահից իրավիճակն անվերահսկելի էր, թե ընդդիմության առաջնորդների, թե իշխանությունների կողմից:

Չմոռանանք, որ նման իրավիճակներում սկսում են ակտիվանալ մեր երկրին թշնամի ուժերը: Եւ ո՞վ կարող է ասել, թե ովքեր կրակեցին եւ ովքեր սպանեցին մեր երկրի տասը քաղաքացու: Ի դեպ, ուկրաինական դեպքերը եւս վկայում են հենց այս մասին: Ի վերջո պարզվեց, որ ցուցարարների վրա իրավապահ մարմինները չեն կրակել:

Այնպես որ, միանշանակ կարող ենք արձանագրել, որ արտակարգ դրությունը մեզ փրկեց նորանոր զոհերից:

Ինչ վերաբերում է զինված ուժերի ներգրավմանը, ապա դա անհրաժեշտ էր մեր երկրի անվտանգությունն ապահովելու համար: Որեւէ մեկը չի կարող պնդել, որ անհայտ ուժերը նման իրավիճակում չէին փորձի ահաբեկչական գործողություններ անել եւ այդ ամենը բարդել ընդդիմադիրների վրա: 

Այնպես որ, արտակարգ դրությունը միայն նպաստեց ավելի խոշոր աղետի կանխմանը եւ թույլ տվեց խուսափել հետագա զոհերից եւ վիրավորներից:

Հակոբ Ասատրյան

Top-News.am