Իսկ դու հասկանո՞ւմ ես ինչ է պատերազմը
ԱԺ «Իմ քայլը» խմբակցության պատգամավոր Հովիկ Աղազարյանը հերթական սկանդալային հայտարարությունն է արել։
«Կարծում եմ, որ ինչքան շուտ սկսվի պատերազմը, էնքան լավ մեր համար, եւ էնքան վատ մեր հակառակորդների համար։ Որովհետև էսօր մեր ազգը էսպիսի համախմբվածության աստիճան ունի, եւ հետեւանքները շատ․․․»,- ասել է այս պատգամավորը, որը շաբաթներ առաջ էլ կոչ էր անում գործարարներից վերցնել նրանց ունեցվածքի 70 տոկոսը:
Աղազարյանը փորձելով մեղմել ասածը մեկ այլ անհեթեթություն է ասում, պնդելով, թե պատերազմին պետք է մասնակցեն տարեցները, հերթական անգամ ապացուցելով, որ պատկերացում անգամ չունի, թե ինչ է պատերազմը, ինչ է ժամանակակից պատերազմը:
Իհարկե, երբ Արցախի հաղթական ազատամարտի ղեկավարներից մեկը կալանավորված է, մյուսների դեմ քրեական գործեր են հարուցված, գեներալների դեմ հակաքարոզչություն է իրականացվում, պատերազմից սկսում են խոսել նրանք, ովքեր պատկերացում անգամ չունեն, թե ինչերի միջով անցնելով ենք կերտել հաղթանակը եւ ինչ է պատերազմը:
Իսկ Հովիկ Հովիկ Աղազարյանը, պարզվում է չի հասկանում, թե ինչ է ժամանակակից զինատեսակներով պատերազմը: Նա պատկերացում չունի, թե ինչ է խաղաղ բնակավայրերի հրթիռակոծումն ու ռմբակոծությունը, եւ որ պատերազմը զոհերից, վիրավորներից բացի ունենում է նաեւ իր փախստականները:
Հովիկ Աղազարյան, իսկ դու հասկանո՞ւմ ես, թե ինչ է ռազմաճակատի առաջին գծում եւ բանակում ունենալ որդի, ամուսին, զավակ, թոռնիկ եւ լսել, որ ինչ որ պատգամավոր ասում է, թե որքան շուտ սկսվի պատերազմը, այնքան լավ:
Սույն պատգամավորը, որը ներկայացնում է կառավարող ուժը, չի հասկանում, չի գիտակցում, որ պատերազմի վերսկսման մասին լսելուց հետո շատ-շատերը մտածում են երկրից հեռանալու կամ գոնե իրենց որդիներին երկրից հեռացնելու մասին: Նա չի հասկանում, որ նման հայտարարությունները բացառապես խուճապ են առաջացնում:
Ժամանակակից աշխարհում, քաղաքակիրթ աշխարհում ցանկացած հակամարտություն, խնդիր լուծում են բանակցելով եւ ոչ թե կռիվ-կռիվ խաղալով: Իհարկե, խաղաղության ամենալավագույն միջոցը պատերազմին պատրաստ լինելն է, բայց դա չի նշանակում անպատասխանատու հայտարարություններ պատերազմի մասին:
Գեղամ Նազարյան
Top-News.am