Ինչպես են խաբում եւ հարստահարում «նոր» Հայաստանի արժանապատիվ քաղաքացիներին
Վարչապետը մի քանի անգամ նայելով ժողովրդի աչքերին հայտարարեց, թե գազի գինը սպառողի համար չի թանկանալու: ՀՀ արժանապատիվ քաղաքացիների մի մասը հավատաց նրան, իսկ թե ինչ եղավ հետո՝ շատ հուզիչ է:
Եւ այսպես, փետրվար 10-ից սկսած, երբ արդեն բաժանորդներն իմացան, թե որքան պետք է վճարեն հունվարին սպառած գազի դիմաց, մեղմ ասած, շոկ ապրեցին: Պարզվեց գազը թանկացել է, ընդ որում, լավ է թանկացել:
«Դուխով» եւ շարքային քաղաքացիները ստուգեցին թվերը, համեմատեցին հաշվիչի ցուցմունքների հետ եւ հասկացան, որ իրենց, մեղմ ասած, միամիտ վայրենիների տեղ են դրել: Հիմա մեզ ուզում են համոզել, որ մենք հունվարին անհամեմատ ավելի շատ գազ ենք սպառել, քան` դեկտեմբերին: Ակնհայտ սուտ:
Հունվարին ավելի ցուրտ չի եղել, քան դեկտեմբերին: Ավելին, տոների հետ կապված դեկտեմբերին ավելի շատ գազ են սպառում, քան հունվարին: Իսկ որ ամենակարեւորն է, տնային տնտեսուհիները միաբերան պնդում են, որ հիմա սուրճ, ճաշ պատրաստելու համար ավելի շատ ժամանակ են ծախսում, քան մինչ հունվարի մեկը: Սա նշանակում է, որ գազի կալորիականությունը կամ օգգ-ն կտրուկ նվազել է:
Այս ամենի հետեւանքով գազի համար վճարում ենք 1,6, 1,7 անգամ ավելի շատ, քան մինչեւ հունվարի 1-ը: Օրինակ, դեկտեմբերին 15 հազար վճարողը հիմա կվճարի 24-25 հազար, 20 հազար վճարողը 32-33 հազար եւ այսպես շարունակ: Եւ եթե բազմաչարչար սպառողին թվում է, թե հունվարը բացառություն է կազմելու, ապա սխալվում են: Վերցրեք ձեր վճարման կտրոնները, ստուգեք ձեր ծախսը փետրվարին եւ կհասկանաք, որ փետրվարի համար մարտին վճարելու եք նույնքան շատ:
Տեղի է ունենում մեծ խաբեություն, իսկ Նիկոլ Փաշինյանի կառավարությունը լռում է: Նախկինում եւս եղել են դեպքեր, որ առանձին վերցրած ամիսներին գազի կալորիականությունը կտրուկ նվազել է, բայց այն ժամանակ իշխանությունները լռում էին, իսկ ժողովուրդն էլ հասկանում էր, որ ամեն ինչ տեղի է ունենում կառավարության համաձայնությամբ, կոռուպցիոն սխեմաների միջոցով:
Իսկ հիմա ի՞նչ ասի «դուխով» հանրությունը, որը մի քանի ամիս առաջ «Նիկոլ վարչապետ, Նիկոլ վարչապետ» էր վանկարկում: Նիկոլը լռում է ժողովրդին ստիպելով մտածել տխուր իրականության մասին:
Կառավարությունը լռում է, բայց մենք հստակ պատասխան ենք պահանջում. ինչո՞ւ ենք գազի համար շատ վճարում, եւ ինչո՞ւ ենք շարունակելու շատ վճարել: Եթե գազի գինը թանկացել է, ապա ավելի ազնիվ կլինի ոչ թե խաբեությամբ շորթել այդ գումարները, այլ պարզ հայտարարել, որ գազը թանկացել է եւ մատակարարել որակ ունեցող գազ:
Գեղամ Նազարյան
Top-News.am