Ռոբերտ Քոչարյանի նկատմամբ իրականացվում է քաղաքական հետապնդում

ՀՀ երկրորդ նախագահ Ռոբերտ Քոչարյանի խափանման միջոցը չփոխվեց: Դատարանը մերժեց պաշտպանական կողմի ներկայացրած բոլոր բողոքները։ Սա նշանակում է, որ ՀՀ երկրորդ նախագահը կշարունակի մնալ կալանքի տակ։

ՀՀ երկրորդ նախագահի փաստաբան պարոն Ալումյանը շեշտեց, որ կայացված որոշուման մեջ իրավական կոմպոնենտը ամբողջովին բացակայում էր, ինչը նշանակում է, որ գործ ունենք ամենասովորական քաղաքական պատվերի հետ:

Հայաստանյան դատաիրավական համակարգին այս որոշումամբ ծանրագույն հարված հասցվեց: Եւ եթե բարձրակարգ իրավաբանները պնդում են, որ դատարանի որոշուման մեջ իրավական կոմպոնենտը ամբողջովին բացակայում է, ապա մնում է եզրակացնել, որ դատարանը որոշումը կայացրել է «վերեւից» զանգ ստանալով:

Դժվար է ասել, թե Ռոբերտ Քոչարյանին թողնելով կալանքի տակ իշխանություններն ինչ են անում՝  պարզապես քաղաքական վենդետա են իրականացնում, նեղ անձնական վրեժ լուծում, թե միջազգային ինչ-ինչ կառույցների պատվեր կատարում: Որ տարբերակն էլ, որ լինի, մենք մտահոգվելու բազմաթիվ պատճառներ ունենք:

Ռոբերտ Քոչարյանը եւս համոզված է, ինչպես հայտնեց իր փաստաբանը, որ իրականացվում է քաղաքական հետապնդում: Արդեն պարզ է, որ գործը հասնելու է Եվրոպական դատարան, եւ թե ինչ որոշում այնտեղ կկայացվի ավելի քան պարզ է, քանի որ իրավաբանության տեսանկյունից այս գործը, ինչպես պնդում են մասնագետները, ծայրից ծայր «կարված» է:

Իսկ այսօր հրաշալի հնարավորություն էր ստեղծվել ուղղել մեր դատաիրավական համակարգի մեջքը կամ քայլ անել այդ ուղղությամբ եւ փոխել երկրում առկա բարոյահոգեբանական մթնոլորտը, ինչը շատ կարեւոր է հատկապես այսօր, երբ Հայաստանին բազմաթիվ մարտահրավերներ են նետված:

Վարդան Մխիթարյան

Top-News.am