Ինչո՞ւ են դատարկ մեր մարզադաշտերը

Օրեր առաջ անդրադարձել էինք Երեւանում նոր՝ 30 հազար տեղանոց մարզադաշտ կառուցելու մասին ՀՖՖ նախագահ Արթուր Վանեցյանի հայտարարությանը, շեշտելով, որ մինչ մարզադաշտին հասնելը կարելի է եւ պետք է այլ խնդիրներ լուծել:

Մասնավորապես, ընդգծելով, որ այս պահին մարզադաշտը չէ, որ մեր առաջնային խնդիրը պետք է լինի, առաջարկել էի մտածել ֆուտբոլի զարգացման համար Երեւանում եւ մարզերում որակյալ խաղադաշտեր կառուցել, զարգացնել ֆուտբոլային ենթակառուցվածները:

Ինչ վերաբերում է մարզադաշտին, ապա առաջին հերթին պետք է մտածել եղածը պահպանելու, վերակառուցելու, եւ նոր միայն նորը կառուցելու մասին, եւ եթե գործը հասնի դրան, ապա այն պետք է լինի ոչ Երեւանում:

Եւ ահա երեկ որոշեցինք Վազգեն Սարգսյանի անվան «Հանրապետական» մարզադաշտում ներկա լինել առաջնության առաջատարներից մեկի՝ «Փյունիկի» «Արարատի» հետ հանդիպմանը:

Հրաշալի նոյեմբերյան եղանակ, գրեթե որակյալ խոտածածկ, մարզադաշտ, որը գրեթե քաղաքի կենտրոնում է, շրջապատված բնակելի թաղամասերով, բայց գրեթե դատարկ մարզադաշտ:

Արեւելյան տրիբունայում կլիներ մոտ վաթսուն, իսկ արեւմտյանում մի փոքր ավելի երկրպագու: Իրոք, ցավալի եւ տխուր տեսարան: Շատերը կշտապեն ասել, թե պատճառը թիմերի վատ խաղն է: Ոչ, թիմերին հանգիստ թողեք: Մասնավորապես «Փյունիկը» եւ «Արարատը» բավական գրագետ եւ դիտարժան ֆուտբոլ ցուցադրեցին: Կատարելություն չէր, Անգլիայի առաջնություն չէր, բայց հաստատ պակաս չէր Շոտլանդիայի կամ Ռուսաստանի առաջնություններից, որտեղ խաղերը անգամ վատ եղանակային պայմաններում ընթանում են լեցուն կամ գոնե ոչ դատարկ մարզադաշտերում, երբ այնտեղ մուտքը տոմսով է, իսկ մեզ մոտ՝ անվճար:

Ուրեմն, սկսենք մտածել այն մասին, թե ինչպես ֆուտբոլասերներին բերենք մարզադաշտ: Հավատացեք, այս ուղղությամբ որեւէ քայլ չի արվում: Սա փաստ է: Նույն ժամին, երբ ընթանում էր խաղը, մարզադաշտի հարեւանությամբ գտնվող շենքերի բակերում պարապ կանգնած էին հարյուրավոր տղաներ, որոնք ֆուտբոլ սիրում են, բայց որոնք հավանաբար չգիտեին էլ, որ քիչ հեռվում բավական հետաքրքիր խաղ է ընթանում:

Իսկ երբ ֆուտբոլասերը գնա մարզադաշտ, այդ ժամանակ արդեն մարզադաշտի տնօրինությունը, ՀՖՖ-ն կմտածի այն մասին, որ «Հանրապետական» մարզադաշտում թեյ, սուրճ կամ հյութեր վաճառվեն կամ համապատասխան ապարատներ ու աղբարկղեր տեղադրված լինեն, կմտածեն այն մասին, որ գոնե խաղի օրերին վերացվի «քրչի բազարը», եւ վերջապես կանեն ամեն ինչ, որ մարզադաշտի զուգարանից կեղտոտ գոմի հոտ չգա, եւ որ այնտեղ ջուր լինի, իսկ ծորակներն էլ լինեն գոնե ոչ վտանգավոր մարդու առողջության համար:

Իսկ դուք խոսում եք նոր մարզադաշտի կառուցման մասին, երբ եղածը նորմալ չեք շահագործում եւ դեռ չեք մտածել մարդկանց մարզադաշտ բերելու մասին:

Ցավոք, մեր նախորդ հրապարակումը մնաց գրեթե անպատասխան, չհաշված մեկ երկու լրատվամիջոցի փորձը քծնել Արթուր Վանեցյանին: Ի դեպ, այս խաղին հատուկենտ լրագրողներ կային, իսկ ովքեր չկային, հաստատ կրկին կփորձեն քծնել Վանեցյանին:

Իսկ այս լուսանկարները կօգնեն պատկերացում կազմել ինչ վիճակ էր մարզադաշտում, իսկ «Արարատի» միայնակ եւ կոլորիտային երկրպագուն այնքան լավ էր աջակցում իր թիմին, որ ավելի թույլ կազմով համալրված «Արարատը» հաջողացրեց հաղթել «Փյունիկին»:

Գեղամ Նազարյան

Top-News.am