ՀՀԿ-ական թեկնածուները ֆանտաստ գրողներ են

Այսօր լրանում է խորհրդարանական ընտրությունների նախընտրական քարոզարշավի 7-րդ օրը: Մեկ շաբաթ շարունակ բոլոր կուսակցությունները քաղաքից՝ քաղաք, թաղից՝ թաղ անցնելով փորձում են ներկայացնել իրենց նախընտրական ծրագիրը եւ շահել ընտրողի վստահության քվեն:

Այս ընտրություններին մասնակցելով՝ Հայաստանի հանրապետական կուսակցությունը փորձում է խորամանկել: «Առաջընթաց եւ անվտանգություն» քարոզող այս քաղաքական ուժի թեկնածուները մի սկզբունք են որդեգրել. իբր թե ընտրություններից առաջ խոստումներ չեն տալիս, այլ գործով են ցույց տալու իրենց ասելիքը:

Մասնավորապես, Շիրակի մարզում եւ մարզկենտրոն Գյումրիում ակտիվ քարոզչություն անող ՀՀԿ-ի ռեյտինգային ցուցակի թեկնածուները իրենց մասին ֆիլմաշարեր են պատվիրում, որ հեռարձակեն տեղական հեռուստաընկերություննով: Նրանք այս ամենով ցանկանում են ցույց տալ, իբր թե նախկինում արած գործեր ունեն: Տեսաֆիլմերը հավանաբար ֆանտազիայի ժանրից են կամ սցենարի հեղինակը վառ երեւակայություն է ունեցել:

Չգիտես ինչու՝ թեկնածուի ԱԺ-ում գտնվելը եւ նիստերին մասնակցել, հարց բարձրաձայնելը համարել են հերոսություն եւ հիմա դա ժողովրդին ցույց են տալիս, որպես կատարած աշխատանք: Չի բացառվում նաեւ, որ ՀՀԿ-ի թեկնածուները այս տարբերակն են ընտրել եւ նոր խոստումներ չեն տալիս, այն բանի համար, որ ՀՀԿ-ն Գյումրուն ու գյումրեցուն 10 տարվա կուտակած կատարելիք խոստումների պարտք ունի: Իսկ ամենամեծ աբսուրդն այն է, որ շատ ՀՀԿ-ականներ դեռ շարունակում են խոսել այն մասին, որ այս ընտրություններն աննախադեպ են լինելու, մի քանի քայլ առաջ, եւ այլն։

Եթե մի պահ հավատանք, որ հրաշքներ են լինում, եւ ենթադրենք, որ ընտրություններն անցնելու են առանց կեղծիքների, միեւնույն է՝ այս ընտրությունները նախորդներից ոչ մի բանով առավել չեն արդեն քարոզարշավի տեսանկյունից։ Նույն խաղի կանոններն են, նույն առաջնահերթությունները, նույն դեմքերն ու նույն ինտրիգները: Սակայն նույնը չէր ընտրողի կարծիքը: Քաղաքացիները նախորդ ընտրությունների նման այս անգամ չեն նստել եւ չեն գուշակում, թե քաղաքական ուժերը ինչ տոկոսներ են ստանալու: Մասնավորապես Գյումրիում՝ արդյունքների վրա իրենց ազդեցությունը ունենալու հարցում ընտրողները վճռական են տրամադրված:

ՀՀԿ-ի թեկածուներից մեկի նախընտրական քարոզարշավի ժամանակ զրուցեցինք մի քանի քաղաքացիների հետ: Փորձեցինք պարզել, թե ի՞նչ կարծիք ունեն ՀՀԿ-ի վարած քաղաքականության եւ անհատ թեկնածուների խոստում չտալու մոտեցումների մասին: «Որ խոստում են տալիս, ի՞նչ օգուտ: Տալիս են ու չեն կատարում: Ես ամեն դեպքում չեմ հավատում՝ ուզում են տան, ուզում են չտան, մեկ է մեր վիճակը նույնն է մնալու»,- մեզ հետ զրույցում ասաց Սայաթ Դավթյանը: Քաղաքացիներից մեկից էլ հատաքրքրվեցինք, թե ինչու՞ է մասնակցում նախընտրական այս հանդիպումներին, եթե խոստումներին չի հավատում: «Էկել եմ, որ տեսնեմ, թե էլ ի՞նչ սուտ ունեն ասելու, որ էս 10 տարվա ընթացքում չեն ասել: Ի՞նչ գործ են արել, որ ասում են՝ մեր խոսքը, մեր գործն է»,- ասում է 67-ամյա Արշակ Գեւորգյանը:

Հասարակական կարծիքից արդեն պարզ է դառնում, որ կառավարող Հանրապետական կուսակցությունը, անկախ այն հանգամանքից խոստում կտա, թե՝ ոչ, ակտիվ հանդիպումներ կկազմակերպի, թե՝ ոչ, գյումրեցի ընտրողը իրեն չի վստահում:

Դավիթ Գասպարյան