Ընտրացուցակներն ավելի խայտառակ դարձան, ռեյտինգային ընտրակարգն էլ պահպանվեց

Հափշտապ կազմակերպված արտահերթ ընտրություններն անցկացվելու են խայտառակ ռեյտինգային ընտրակարգով: Սա դեռ քիչ չէ, այդպես էլ ընտրացֆուցակները կարգի չբերեցին: 

Ավելին, ընտրացուցակները ոչ թե թեթեւացվեցին, այլ... ուռճացվեցին: Հայաստանի ոստիկանության անձնագրային եւ վիզաների վարչությունը ներկայացրել է ընտրություններին մասնակցող անձանց նախնական ցուցակները։

Անձնագրային եւ վիզաների վարչության պետ Մնացական Բիչախչյանն ասել է, թե իրենք ցուցակների մաքրման աշխատանքները վաղուց են սկսել եւ արդեն ունեն գրեթե մաքուր ցուցակներ։

Պատկերացնո՞ւմ եք, մաքրել-մաքրել են եւ 2017թ. ապրիլի համեմատ ցուցակներն ավելացել են 12 հազար 324-ով: Ըստ պաշտոնական աղբյուրների մենք ունենք 
2 միլիոն 577 հազար 122 ընտրող, այն դեպքում, երբ այդքան բնակչություն անգամ չկա Հայաստանում:

Ահա այսպիսի տխուր պատմություն: 2018թ. մայիսից սկսած ոչ միայն ռեյտինգային ընտրակարգը չվերացվեց, անգամ ցուցակները կարգի չբերվեցին, եւ եթե այս ամենին գումարենք, թե հիմնականում ովքեր են պատգամավորի թեկնածուները, ապա կարող ենք արդեն իսկ այսօր արձանագրել, որ մեզ սպասվում են Հայաստանի պատմության ամենախայտառակ խորհրդարանական կամ համապետական ընտրությունները:

Ի դեպ, չմոռանանք հիշեցնել, որ հեղափոխական առաջնորդները շեշտում էին, թե արտահերթ ընտրությունները կանցկացվեն, երբ ցուցակները կարգի բերվեն, ընդունվի համապխատասխան փոփոխություններ Ընտրական օրենսգրքում, վերացվի ռեյտինգային ընտրակարգը:

Հակոբ Ասատրյան

Top-News.am