Ո՞վ է «Իմ քայլի» վերջը

Օրերս պարզ դարձավ դեկտեմբերի 9-ին կայանալիք արտահերթ Խորհրդարանական ընտրություններում մասնակից ուժերի ցուցակներում ընդգրկված թեկնածուների անունները։ Ըստ երևույթին, ամենաանակնկալայինը «Իմ քայլը» դաշինքի ցուցակն է, որտեղ ընդգրկված է 183 անձ՝ զգալի մասը երիտասարդներ եւ քաղաքական ու մասնագիտական ճանապարհ չանցած անձինք։

Ավելի ճիշտ, փողոցներում Նիկոլ Փաշինյանի հետ քայլած մի քանի կիլոմետրը ցուցակում ընդգրկվածների մեծ մասի կենսագրության առանցքային դրվագներից է, նրանց լրջագույն փորձի դրսևորումը․ եթե իհարկե չհաշվենք հեղափոխությունից հետո նրանց շռայլված պաշտոնները։

Հետաքրքիրն այն է, որ Նիկոլ Փաշինյանի 27-ամյա եղբորորդի Սիփան Փաշինյանն ու Աննա Հակոբյանի եղբայրը՝ Հրաչյա Հակոբյանը վերջից երկրորդ և երրորդ տեղերում են, իսկ նրանցից առաջ մեկ այլ երիտասարդ է՝ Նարեկ Մկրտչյանը, ում նույնիսկ հարազատ կուսակցությունում գրեթե չեն ճանաչում։ Ասում են՝ նա ցուցակում է զուտ այն բանի համար, որ ՔՊ նախընտրական ցուցակը չսկսվի և չավարտվի Փաշինյան ազգանվամբ։

Կարելի է պատկերացնել, որքան երկար են պայքարել այդ վերջին տեղի համար երիտասարդ Սիփան Փաշինյանը եւ ոչ պակաս երիտասարդ Հրաչյա Հակոբյանը: Պայքարեցին, բայց պարզվեց «Իմ քայլի» վերջը ոչ թե նրանք են, այլ Նարեկը, որին որեւէ մեկը չի էլ ճանաչում:

«Իմ քայլը» դաշինքի առաջին համարներում ներգրավված են հիմնականում նախարարներ, մարզպետներ, որոշ դեպքերում՝ փոխնախարարներ։ Եվ այս կադրային կարկառուն դեմքերից շատերին արդեն իսկ հասցրել ենք ճանաչել իրենց մտավոր «բացառիկ» ունակությունների ցուցադրման ժամանակ, որոշներին՝ իրենց «նախարարական» անհեռանկար քայլերով, իսկ որոշների անուններն արդեն իսկ շրջանառվել են կոռուպցիոն գործարքներում, ոմանց էլ գիտենք՝ որպես Փաշինյանի՝ ոչ կոմպետենտ կադրեր։ Ինչևէ։

Ակնկալվում է, որ Խորհրդարանում մեծամասնություն ձևավորելուց հետո նախարարական և մարզպետական այս ողջ աստղաբույլը կրկին կվերադառնան գործադիր մարմին՝ իրենց պաշտոններին։ Այդ դեպքում, հետաքրքիր է՝ ովքե՞ր են լինելու մեր պատգամավորները։

Սա շատ լուրջ և ցավոտ հարց է։

Ցուցակում քիչ չեն մարդիկ, ովքեր «Իմ քայլ»-ում են հայտնվել միայն նրա համար, որ կարողացել են ժամանակին կողմնորոշվել։ Ամենաթարմ օրինակը նախկին «Լույս»-ական Հայկ Կոնջոյանն է։ «Իմ քայլը» դաշինքում են նաև նախկին ՀՀԿ-ական ծանրամարտիկ Առաքել Միրզոյանը, ըմբշամարտիկ Արսեն Ջուլֆալակյանը։

«Իմ քայլում» լրագրողների և լրատվական դաշտի նախկին և ներկա ներկայացուցիչների մի ողջ համաստեղություն է՝ Լենա Նազարյան, Սիսակ Գաբրիելյան, Թագուհի Թովմասյան, Զարուհի Բաթոյան, Հայկ Գևորգյան, Լուսինե Բադալյան, Նարինե Թուխիկյան, Բաբկեն Թունյան, Վահագն Թևոսյան, Սարգիս Խանդանյան, Վահագն Հովակիմյան և այլք։

Սա էլ մի առանձին զավեշտ է:

Ցուցակում շատ են անկուսակցականները՝ ցուցակի 36-րդ հորիզոնականում «Թրանսփարենսի ինթերնեյշնլ» հակակոռուպցիոն կենտրոնի իրավախորհրդատու Հերիքնազ Տիգրանյանն է, Հովհաննես Իգիթյանը և մարտի 1-ի գործով փաստահավաք խմբի նախագահ Անդրանիկ Քոչարյանը ևս ցուցակում են` 47 և 46 հորիզոնականներում:

Ցուցակում ընդգրկվածների մի զգալի մաս, որոնք հիմնականում երիտասարդներ են, աչքի են ընկնում միայն նրանով, որ փողոց են փակել, «քայլ են արել»։ Որպեսզի պարզ լինի ողջ պատկերը, ընդամենը մեկ-երկու անուն նշենք, իսկ դուք փորձեք վերջիններիս մասին համացանցում կկարդալ․

• փողոցներ փակելու մեջ «մասնագիտացած» Մարիա Կարապետյան,

• վարչապետի օգնական Արեն Մկրտչյան, ում կենսագրությունը՝ հատկապես վարչապետի օգնականի համար, բավական ուշագրավ է, խորհուրդ ենք տալիս անպայման «գուգլել» ու ծանոթանալ,

• Արարատի մարզպետ Գարիկ Սարգսյան, ով մինչև Նոր Կյանքի գյուղապետ լինելը, երեք տարի Ռուսաստանի դաշնությունում արտագնա աշխատանքի է մեկնած եղել (խոպան), որը Կառավարության կայքում վերաձևակերպվել է՝ որպես ձեռնարկատիրական գործունեություն։

Այս մարդիկ են առաջիկա Խորհրդարանում մեր փոխարեն որոշում կայացնողները, մարդիկ, որոնց ծանրակշիռ հատվածը չունի որևէ անցած ճանապարհ (եթե չհաշվենք Փաշինյանի թիկունքում մի քանի կիլոմետր քայլելը), մինչև հեղափոխությունը չի զբաղեցրել որևէ պետական պաշտոն, իր կյանքի ընթացքում չի ստեղծել որևէ արժեք (եթե ստատուս ու հոդվածներ գրելը չհամարենք արժեք), նույնիսկ նորմալ կրթություն ու աշխատանքային փորձ չունի։ Այս մարդիկ են մեր անունից բյուջե հաստատելու, օրենքներ գործադրելու, տնտեսական զարգացման ուղենիշ սահմանելու, ի վերջո՝ որոշելու Արցախի ճակատագիրը․․․․այս 20-30 տարեկան անձինք։

Գրիգոր Հայրապետյան

Top-News.am