Լրատվամիջոցներին «ասֆալտին փռելու» վտանգը

Խուզարկություն է իրականացվել Yerevan.today-ի խմբագրությունում։

ՀՔԾ-ն հաստատել է այս տեղեկությունը, ավելացնելով, թե խմբագրությունում կատարվող խուզարկությունը որեւէ կերպ առնչություն չունի իրականացվող լրագրողական գործունեության հետ:

Այսուհանդերձ, ցավով արձանագրում ենք, որ իրավապահներն արդեն իրենց թույլ են տալիս մուտք գործել խմբագրություն: Եթե հասարակությունը, լրատվամիջոցները հստակ եւ անաչառ չարձագանքեն տեղի ունեցածին, ապա սա կարող է վատ նախադեպ դառնալ:

Չկա որեւէ բացատրություն, չկա որեւէ արդարացում։ Կա փաստ. խոչընդոտվել է լրատվամիջոցի աշխատանքը։

Որեւէ ճնշում լրատվամիջոցների նկատմամբ անընդունելի է: Լրատվամիջոցների դեմ ուղղված քայլերը մեզ հետ են շպրտում զարգացման ճանապարհից: Հայաստանի պատմությունը եւս ցույց է տվել, որ լրատվամիջոցների դեմ ուղղված քայլերը, մեղմ ասած, չեն նպաստել երկրի զարգացմանը եւ ժողովրդավարության հաստատմանը:

Ցավալի է, բայց այսօր որոշ լրատվամիջոցների ներկայացուցիչներ անգամ հրճվանքով են արձագանքել տեղի ունեցածին, ուժային կառույցներին կոչ անելով ավելի «սեղմել» խուզարկվող լրատվամիջոցին, չհասկանալով, որ վաղը նույն այդ ուժայինները կարող են հայտնվել իրենց տարածքում: Դժվարը առաջին քայլն է....

Այս խուզարկությունը ոչ միայն անհանգստացնում է, այլ բազմաթիվ հարցեր առաջացնում, որոնց պատասխանները հուսանք կստանանք: Իսկ առայժմ արձանագրենք, որ լրատվամիջոցներին «ասֆալտին փռելու» մղումը խիստ մտահոգիչ է։

Գեղամ Նազարյան

Top-News.am