Ֆուտբոլն էլ բաժանեցին սեւի եւ սպիտակի

Ժողովուրդը դուրս եկավ փողոց, մերժեց հին վարչախմբին նաեւ այն պատճառով, որ գրեթե ամենուր փակ համակարգեր էին, որտեղ բացառապես ՀՀԿ-ականներն էին կամ վարչախմբին մոտ կանգնած դեմքերը, այլ կերպ ասած՝ յուրայինները:

Մարդիկ հոգնել էին այս ամենից եւ փոփոխություն էին ուզում: Հայաստանի առաջադեմ հասարակությունը պայքարում էր ոչ թե փակ համակարգերը պահպանելու եւ ՀՀԿ-ն ՔՊ-ով փոխարինելու, այլ իրական փոփոխությունների համար:

Հասարակությունը ցանկանում էր ազատվել այս կամ այն կառույցը յուրայիններով համալրելու արատավոր գործելաոչից: Ժողովուրդն իրական փոփոխությունների համար էր փողոց դուրս եկել, եւ ոչ թե նոր փակ համակարգերի ստեղծման համար:

Հիմա, երբ անգամ հպանցիկ հայացք ես գցում Հայաստանի ֆուտբոլի ֆեդերացիայի գործկոմի անդամների թեկնածուների ցանկին, միանգամից աչքի է զարնում այն, որ ձեւավորվում է հերթական փակ համակարգը:

Այնպիսի տպավորություն է, որ կառավարությունում վստահ են, որ ֆուտբոլի զարգացմամբ բացառապես կարող են կամ պետք է զբաղվեն նրանք, ովքեր ՔՊ-ական են կամ քայլելով Գյումրիից Երեւան են հասել, ընդ որում, միաժամանակ նաեւ ֆուտբոլային տնտեսության հետ էլ ոչ նախկինում ոչ ներկայում կապ չեն ունեցել:

Ավելորդ անգամ անուններ չտանք: Դրա կարիքը չկա, քանի որ ցանկը հրապարակել են գրեթե բոլոր լրատվամիջոցները:

Իսկապես, այս ճանապարհը չի կարող տանել ոչ երկրի, ոչ առավել եւս ֆուտբոլի զարգացման: Օր առաջ այս գործելաոճից պետք է ազատվել, ժամ առաջ պետք է դադարեցվեն պատեր, պատնեշներ կառուցելը եւ հասարակությունը սեւի եւ սպիտակի բաժանելը:

Հայաստանում կան շատ ու շատ մարդիկ, որոնք ոչ միայն ֆուտբոլասեր են, այլ նաեւ հստակ պատկերացում ունեն, թե ինչպես պետք է զարգացնել ֆուտբոլը եւ ֆուտբոլային ենթակառուցվածքները, ընդ որում, դա կարող են անել առանց աղմուկ-աղաղակի եւ զուռնա-դհոլի:

Գեղամ Նազարյան

Top-News.am