Uber-ը NASA-ի հետ թռչող տաքսիների մասին համաձայնագիր է կնքել

Uber Technologies Inc. ընկերությունը NASA-ի հետ գործընկերության մասին երկրորդ համաձայնագիրն է կնքել, հայտնում է Bloomberg-ը:

Եթե 2017 թվականի նոյեմբերին կնքված առաջին համաձայնագիրը վերաբերում էր անօդաչու թռչող սարքերին, ապա հիմա խոսքը օդաչուի կողմից կառավարվող թռչող տաքսիների ոլորտում համագործակցության մասին է:

«Քաղաքային օդային երթեւեկությունը կարող է հեղափոխության հանգեցնել այն առումով, թե մեր քաղաքներում մարդիկ եւ բեռներն ինչպես են տեղափոխվում, եւ մեր կյանքն արմատապես փոխել ճիշտ այնպես, ինչպես սմարթֆոնները փոխեցին»,- իր հայտարարության մեջ նշել է NASA-ի ներկայացուցիչը:

Bloomberg-ը հստակեցնում է, որ Uber-ը նպատակադրվել է 2020 թվականին սկսել էլեկտրական թռչող սարքերի թեստավորումը, իսկ 2023 թվականից ծրագրվում է դրանց արդեն կոմերցիոն շահագործումը:

NASA-ի հետ առաջին համաձայնագիրը ստորագրելուց հետո Uber-ի արտադրանքի գծով տնօրեն Ջեֆ Հոլդենը նշել էր, որ թռչող տաքիի թեստավորումը կսկսվի 2020 թվականին Լոս Անջելեսում: Մեքենան նախատեսված է 4 ուղեւորի համար եւ կարող է զարգացնել մինչեւ 322 կմ/ժ արագություն: Ծրագրվում է, ըստ թռչող տաքսիների կանչի, ծառայությունն ամբողջական հզորության հասցնել 2023 թվականին: Այդ ժամանակ ընկերությունում Reuters-ի բարձրաստիճան աղբյուրը նշել էր, որ Uber-ը պատրաստ է համագործակցել ԱՄՆ եւ Եվրոպայի ավիացիոն իշխանությունների հետ:

Լուրեր Հայաստանից - NEWS.am