Հայաստանի հրդեհվող «առեւտրի կենտրոնը» ճանապարհներն են
Ռուսաստանի Կեմերովո քաղաքում իսկական ողբերգություն տեղի ունեցավ: Հրդեհը, որը տեղի ունեցավ քաղաքի առեւտրի կենտրոնում խլեց 64 մարդու կյանք: Զոհերի մեծ մասը երեխաներ են:
Ռուսաստանում մեղավորներ են փնտրում: Իհարկե՝ կգտնեն, բայց դրանով հարցը չի լուծվի, քանի որ պատճառները վերացնելու փոխարեն մեղավորներ են փնտրում, գտնում, շոու սարքում դատում եւ սպասում, թե երբ է տեղի ունենալու հաջորդ ողբերգությունը:
Հայաստանում եւս Կեմերովոյի ողբերգությունից հետո ԱԻՆ-ը ստույգայցեր կատարեց առեւտրի կենտրոններում: Ճիշտ արեցին: Նման ստուգումներ պետք է հաճախ իրականացվեն եւ ոչ ցուցադրաբար, բայց երբ ենք մենք լրջորեն խոսելու այն մասին, որ մեր երկրի՝ Հայաստանի վառվող «առեւտրի կենտրոնը» ճանապարհներն են:
Մարդկային կյանքեր խլող, մարդկանց հաշմանդամ դարձնող վթարների թիվը չի նվազում, իսկ մենք հետություն չենք անում, համապատասխան մարմինները կտրուկ քայլեր չեն ձեռնարկում:
Այսօր եւս ավտովթարը մեկ կյանք խլեց, մի քանի հոգի վիրավորվեցին: Ժամանակը ցույց տվեց, որ տեսախցիկները խնդիրը չեն լուծում: Խնդիրը համակարգային եւ լուրջ լուծումներ է պահանջում: Միայն այս տարվա հունվարին ավտովթարներից 36 հոգի է մահացել: 36 մարդ զոհվել է ավտովթարից: Մենք չենք տխրում, չենք սգում: Երեւի պետք էր, որ բոլորը մեկտեղ զոհվեին, որ մենք սթափվեինք:
Ոմանք մտածում են անպատիժ են, ոմանք լկտի են, ոմանք այնքան են գազազել, որ դիմացինին զիջելու մասին չեն էլ մտածում, ոմանք կանոններին չեն տիրապետում, ոմանք հարբում են, ասելով, թե այսպես ավելի լավ են վարում: Թվարկումը կարող ենք դեռ շարունակել, բայց որ ճանապարհներին պետք է կարգ ու կանոն հաստատել՝ փաստ է:
Ցերեկային ժամերին Երեւանը լեցուն է ավտոմեքենաներով: խոսքը տաքսիների մասին չէ: Ինչ գործ ունի աշխատանքային ժամին փողոցում: Մի՞թե պարտադիր է, որ երեխաներին ավտոմեքենաներով տուն տանենք եւ բերենք կամ ուսանողներին ավտոմեքենա հատկացնենք, որ համալսարան ոտքով չգնան, իսկ նրանք էլ քաղաքում պտույտներ գործեն:
Կոնկրետ եւ խիստ միջոցառումներ են անհրաժեշտ: Մենք ընդամենը երկու միլիոն ենք եւ մի ամսում 36 զոհը ավտոճանապարհներին իսկական ողբերգություն է:
2017թ. հոկտեմբերին տեղեկություն տարածվեց, պաշտոնական տեղեկություն, որ վերջին տասը տարում Հայաստանում ավտովթարի հետեւանքով զոհվել է 3267 մարդ, իսկ վիրավորվել 36 հազարը:
Մենք սգում ենք Կեմերովոյի զոհերի համար: Ճիշտ ենք անում: նորմալ մարդը նման դեպքերում պետք է սգա: Աբսուրդն այն է, որ չենք նկատում մեր քթի տակ տեղի ունեցող ողբերգությունը: իրոք ժամանակն է կոնկրետ, մտածված եւ խիստ գործողությունների:
Գեղամ Նազարյան
Top-News.am