«Շանթը» «Էլենի օրագիրը» շփոթում է ֆուտբոլի հետ

Մեկ շաբաթ առաջ մենք տեղեկացանք, որ «Շանթ» հեռուստաընկերությունը գնել է ֆուտբոլի Եվրոպայի լիգայի խաղերի հեռարձակման իրավունքը: Իմացանք նաեւ, որ «Շանթը» գնել է խաղերի հեռարձակման իրավունքը, որ խաղերը չհեռարձակի: Ավելին, դեռ հերիք չէ 1/8-րդ եզրափակիչ 16 խաղերից հեռարձակելու են միայն երկուսը, դեռ մի բան էլ պահանջել են, որ «Յուքոմը» եւ «Ռեստելեկոմը» փակեն բոլոր այն ալիքներն այն ժամանակ, երբ ընթանում են ֆուտբոլային մյուս հանդիպումները:

Մեկ շաբաթ առաջ մտածեցինք, որ «Շանթը» խամություն է արել, եւ որ շուտով կհասկանա իր սխալը: Այսօր մենք կրկին բախվեցինք դաժան իրականության հետ կրկին անգամ: «Շանթի» ղեկավարության պահվածքը կարելի է որակել եւ մանր խուլիգանություն, եւ չուզողություն, եւ դավադրություն ուղղված հայ ֆուտբոլասերների դեմ:

Այս դեպքում արդեն երկրի համապատասխան մարմինները պետք է իրենց բարձրության վրա գտնվեն եւ պաշտպանեն ՀՀ քաղաքացու ոտնահարված իրավունքը, ապացուցելու համար, որ մենք պետություն ունենք: «Շանթին» պետք է պարտադրվի ցուցադրել բոլոր խաղերը, կամ պետք է բնակչությանը հնարավորություն տրվի խաղերին հետեւել այլ հեռուստաալիքներով:

ՀՀ քաղաքացին յուրաքանչյուր ամիս 10, 15 կամ 18 հազար մի կողմ է դնում, որ ֆուտբոլ դիտի, իսկ ինչ որ մեկը որոշում է, որ ինքն այնքան կա, որ բոլորին կարող է զրկել սպասված հաճելի ժամանցից եւ ջուրը գցել ՀՀ քաղաքացու փողերը:

Կարծում ենք, որ կգտնվեն փաստաբաններ, որոնք կնախաձեռնեն կոլեկտիվ հայց ֆուտբոլասերների կողմից «Շանթ» հեռուստաընկերության դեմ: «Շանթը» պետք է փոխհատուցի մեր քայքայված նյարդերի եւ ջուրը գցված գումարների համար, իսկ պետությունն էլ պետք է ապացուցի, որ, իրոք, ՀՀ քաղաքացու իրավունքների պաշտպանն է:

Գեղամ Նազարյան

Top-News.am