0 հարց եւ 0 ելույթ, բայց գյումրեցիներից կրկին քվե է ակնկալում

ՀՀ Ազգային ժողովում աթոռ շատերն են ցանկանում ունենալ, բայց ինչ նպատակով է պայմանավորված այդ ցանկությունը, դժվար չէ կռահել. բնականաբար, անձնական շահի, սեփական բիզնեսի եւ սեփական կուսակցության նախագծերի համար ձեռք բարձրացնելու նպատակով:

ՀՀ ԱԺ 131 պատգամավորներից 55-ը, ըստ հասարակական կազմակերպություններից մեկի ներկայացրած հաշվետվության, լուռ է մնացել: Այսինքն՝ 0 հարց եւ 0 ելույթ: Նրանց թվում են Գյումրիից ընտրված, Շիրակի մարզը եւ Գյումրին ներկայացնող ՀՀԿ-ականներ` Արման Սահակյանը եւ Աշոտ Աղաբաբյանը:

Արման Սահակյանը, ով ավելի շատ հայտնի է որպես բիզնեսմեն, կարելի է ենթադրել, որ ընդհանրապես կապ չունի օրենսդիր մարմնի հետ: ԱԺ-ում նա մասնակցել է 627 նիստի, որի ժամանակ հանուն ՀՀԿ-ի եւ Սերժ Սարգսյանի 620 անգամ կողմ է քվեարկել, 7 անգամ՝ դեմ, բացակայել է 120 անգամ:

«Ես ուզում եմ նոր շունչ տալ Գյումրիի տնտեսությանը, դարձնել քաղաքը արտաքին ներդրումների համար ավելի գրավիչ»,– սա Արման Սահակյանի խոսքերն են՝ 2012 թվականի ԱԺ ընտրությունների նախաշեմին:

Ներդրումների համար Գյումրին գրավիչ դարձավ միայն Սերժ Սարգսյանի եւ մյուս ՀՀԿ-ականների համար: Այս խոստում-ինքնախաբեությանը զուգահեռ, ինչպե՞ս է ստացվել, որ հանրապետության սոցիալապես ամենաանապահով քաղաքը ներկայացնող Սահակյանը ոչ մի հարց չուներ Գյումրիից եւ գյումրեցու անունից բարձրաձայնելու: Սահակյանի լռությանը զուգահեռ՝ Գյումրիում աղքատությունը 2012-2016 թվականներին հասնում է 46 տոկոսի, իսկ արտագաղթողների թիվը անցնում է 30 հազարի շեմը:

Տրված խոստումները չիրականացրած Արման Սահակյանը Գյումրիում կրկին ոտքի է կանգնել. ցանկանում է 2017-ին եւս ԱԺ պատգամավոր դառնալ՝ ՀՀԿ-ի ռեյտինգային ցուցակով: Նա մոռանում է, որ գյումրեցին նախորդի նման միամտորեն չի հավատալու եւ իրեն քվե չի տալու: Բավարար է միայն հիշել, թե Սահակյանի թեթեւ ձեռքով Գյումրիում նախորդ խորհրդարանական ընտրությունների ժամանակ ՀՀԿ-ն ինչ խայտառակ պարտություն է կրել: Այն ժամանակ գյումրեցին չվստահեց ՀՀԿ-ին եւ նրա թեկնածուին: Այժմ էլ չի վստահի՝ տեսնելով Սահակյանի անտարբերությունը իր եւ իր խնդիրների նկատմամբ:

Գյումրեցիներից շատերի մոտ հարց է առաջանում, թե ի՞նչ մտադրությամբ է այս անձը ցանկանում կրկին անգամ Գյումրու անունից տեղ զբաղեցնել խորհրդարանում, երբ մի ձեւական հարց չի բարձրացրել հօգուտ Գյումրիի խնդիրների լուծման:

«Իրան ինչ պետք է, որ մեր մասին մտածե: Ինքը էնդեղ է նստել, որ իրա գործերը ու բիզնեսը առաջ տանի: Ինքը Սերժի փեսու ընկերն է, իրան ի՞նչ պետք է, որ Սերժի աչքից ընկնի»,- այս թեմայի շուրջ զրույցում ասաց գյումրեցի մանկավարժներից մեկը, ում արդեն հրահանգել են ընտրել ՀՀԿ-ական թեկնածուին:

Դավիթ Գասպարյան,
Գյումրի

Այս թեմայով Վարդան Ղուկասյանը երկու ամսով կալանավորվեց Գյումրիի քաղաքապետարանը քաղաքացիներին հորդորում է չտրվել սադրանքների Կարմիր ու սեւ բերետավորները բիրտ ուժի կիրառմամբ բերման են ենթարկում քաղաքացիներին. լսվում են հայհոյանքներ (տեսանյութ) Գյումորւ քաղաքապետ Վարդան Ղուկասյանին տեղափոխում են Երևան՝ Հակակոռուպցիոն կոմիտե Ինչպես են կարմիր բերետավորները մուտք գործում Գյումրիի քաղաքապետարանի շենք (տեսանյութ)