Հունվար-օգոստոսին Հայաստանում գրանցվել է 28,596 հանցագործություն 

ՀՀ վիճակագրական կոմիտեի տվյալներով՝ 2026 թվականի հունվար-օգոստոսին Հայաստանում գրանցվել է 28 հազար 596 հանցագործություն։ Դրանցից 10 հազար 977-ի վերաբերյալ գործերն ուղարկվել են դատարան, իսկ 1246 դեպքով վարույթը կարճվել է։

Գրանցված հանցագործությունների ավելի քան կեսը՝ 15 հազար 331 դեպք, վերաբերել է հասարակական անվտանգության, հասարակական կարգի և բնակչության առողջության դեմ ուղղված հանցագործություններին։ Դրանց թվում 2 հազար 053-ը եղել են թմրամիջոցների հետ կապված հանցագործություններ, իսկ 1293-ը՝ տրանսպորտային միջոցների երթևեկության և շահագործման կանոնների խախտումներ, որոնցից 77-ը՝ մահվան ելքով։

Սեփականության դեմ ուղղված հանցագործությունների թիվը կազմել է 5 հազար 415, որոնցից 4 հազար 322-ը՝ հափշտակության, իսկ 1306-ը՝ խարդախության դեպքեր։ Մարդու դեմ ուղղված հանցագործությունները կազմել են 3 հազար 858, իսկ պետական իշխանության, ծառայության և կառավարման կարգի դեմ ուղղված հանցագործությունները՝ 2 հազար 998 դեպք։

Ըստ ծանրության՝ գրանցված հանցագործություններից 15 հազար 615-ը եղել են ոչ մեծ ծանրության, 8 հազար 304-ը՝ միջին ծանրության, 3 հազար 486-ը՝ ծանր, իսկ 1191-ը՝ առանձնապես ծանր։

Տարածքային բաշխմամբ՝ գրանցված հանցագործությունների ամենամեծ թիվը բաժին է ընկել Երևանին՝ 11 հազար 745 դեպք։ Սա, սակայն, ինքնին չի նշանակում, որ մայրաքաղաքում հանցավորության մակարդակն ամենաբարձրն է, քանի որ ցուցանիշը ներկայացված է բացարձակ թվերով և  հաշվի չի առնում բնակչության թվաքանակը։ Մարզերից առավել մեծ թվով հանցագործություններ գրանցվել են Արմավիրում՝ 3 հազար 260, Կոտայքում՝ 2 հազար 645 և Արարատում՝ 2 հազար 452 դեպք։ 

Միևնույն ժամանակ, հանցագործություն կատարած անձանց թիվը կազմել է 12 հազար 795։ Նրանցից 8 հազար 740-ը կատարել են ոչ մեծ ծանրության, 2 հազար 495-ը՝ միջին ծանրության, 1285-ը՝ ծանր, իսկ 275-ը՝ առանձնապես ծանր հանցագործություններ։

Հանցագործություն կատարած անձանց թվով ևս ամենաբարձր ցուցանիշը Երևանում է՝ 5 հազար 008 անձ։ Մարզերից այս ցուցանիշն ամենաբարձրն է Արարատում՝ 1 հազար 584, Կոտայքում և Շիրակում՝ 957-ական, իսկ Լոռիում՝ 904 անձ։

Top news