Ինչ է այսօր կատարվում Ռուսաստանում, Ադրբեջանում եւ Հայաստանում

Ցույց տուր ինձ քո երկրի լուրերը եւ ես կասեմ, թե ինչ երկրում ես ապրում: Սա ժամանակակից ասացվածք է:

Հիմա փորձենք հասկանալ, թե ինչ երկրում են ապրում ռուսաստանցիները, ադրբեջանցիները եւ ՀՀ քաղաքացիները, դիտարկելով այսօրվա մինչ այս ժամի լրահոսը:

Ռուսաստան

Ռուսաստանցիները կամ այդ երկրի եվրոպական հատվածի բնակիչներն օրը սկսեցին լուրով, որ Թայլանդում երկու ռուս կանայք մահացել են ավտովթարի հետեւանքով: Քիչ անց հայտնի դարձավ, որ Մախաչկալայի ձերբակալված քաղաքապետի գործով զբաղվելու է Գլխավոր քննչական կոմիտեն:

Եւ միայն Ռուսաստանում շունը կարող է կրակել տիրոջը: Այո, Սարատովում շունը կրակել է 64-ամյա որսորդ տիրոջը: Այս լուրը մարսելուց հետո ռուսաստանցիներին հայտնեցին, որ Ճապոնիայի վարչապետ Աբեն ասել է, որ Ռուսաստանն ու Ճապոնիան համագործակցության հսկայական ներուժ ունեն:

Քիչ անց ռուսաստանցիներն իմացան, թե ինչով են միմյանցից տարբերվում Մոսկվայի եւ Յակուտիայի սառնամանիքները, եւ որ Սոբչակի շտաբը հավաքել է նախագահի թեկնածու գրանցվելու համար անհրաժեշտ ստորագրությունները:

ՌԴ ԿԲ-ից էլ հայտնեցին, որ ռուսաստանցիներն ավելի լավատես են դարձել, քանի որ ինֆլիացիայի աճի տեմպերը նվազել են: Ահա, թե ինչ քիչ բան է պետք լավատեսության համար:

Հավանաբար այս լավատեսությունն է հիմք հանդիսացել, որ «Դոմոդեդովա» օդանավակայանի ղեկավարությունը որոշի եւս վեց թռիչքուղի կառուցի: Գուցե ռուսաստանցիներին լավատեսություն հաղորդի նաեւ այն, որ նրանք արդեն Սու 30 են վաճառելու նաեւ Մյանմային:

Այսօր ռուսաստանցիները տեղեկացան, որ բանկերը սկսել են ավելի հաճախ վարկային քարտեր տրամադրել, եւ որ Օմսկում հրդեհի հետեւանքով հինգ երեխա է զոհվել:

Իսկ Մոսկվայում անհայտ հանցագործները քոլեջի ուսանողից յոթ միլիոն ռուբլի են խլել: Գտեք մեկ ուրիշ երկիր, որտեղ քոլեջի ուսանողի մոտ այդքան փող է լինի:

Իսկ «հերոսները» քաջաբար ջարդել են արջի հսկա արձանի ականջները Կամչատկայում: Եւ հենց այս տեղեկությունից հետո միանգամից ռուսաստանցիներին հայտնում են, որ գործազրկության մակարդակն ընկել է երեք տոկոսով:

Ահա այսպիսին է Ռուսաստանը հունվարի 22-ին: 

Ադրբեջան

Ադրբեջանցիների տրամադրությունն առավոտ շուտ բարձրացնելու համար միանգամից հաղորդեցին, որ նավթի գներն աճում են, եւ որ Զարուհի Փոստանջյանին արգելել են մտնել Վրաստան:

Եւ այսքանից հետո նոր միայն հայտնեցին, որ Բաքվում ձերբակալվել է այն տղամարդը, որը բռնաբարել էր քրոջ աղջկան: Ձերբակալվել են նաեւ այն հանցավոր խմբի անդամները, որոնք զբաղվել են օտարերկրյա ներդրումներով ստացված գումարների մանիպուլյացիայով:

Ադրբեջանցիներն այսօր նաեւ իմացան, որ այսուհետ դեղատներին արգելվել է դեղ վաճառել երեխաներին: Հավանաբար պատճառն այն է, որ Ադրբեջանում արդեն հայտնի է դարձել, որ գոյություն ունեն այլմոլորակային վիրուսներ կամ այն, որ ադրբեջանցիներն ավելի հաճախ մահանում են սրտային հիվանդությունների պատճառով:

Ադրբեջանցիներին գուցե ուրախացրել է նաեւ այն, որ լինելու է տասը աստիճան տաքություն: Իսկապես, ինչու չուրախանեն, երբ Երեւանում ընդամենը յոթ աստիճան է լինելու:

Իսկ հաջորդ լուրը, որ գրպանահատը մետրոյում թալանել է կանանց, հազիվ թե, ուրախացնի ադրբեջանցիներին, հատկապես կանանց: Բայց երբ հայտնի դարձավ, որ Ադրբեջանն Իրանին կես միլիարդ դոլար է հատկացնելու երկաթուղագծի կառուցման համար, կարծում ենք ամեն ինչ տեղն ընկավ:

Հայաստան

Հայաստանցիներն օրը սկսեցին այն տեղեկությամբ, որ որոշ գիտնականներ առաջարկել են դեռահաս համարել մինչեւ 24 տարեկաններին: Թե այս լուրը տարածելով ինչ էին ցանկանում հասկացնել լրատվամիջոցները, դժվար է ասել:

Բայց նույն լրատվամիջոցներն իրենց պարտքն են համարել ՀՀ քաղաքացիներին պարտադիր տեղեկացնել, որ մի այրված տնակում դի է հայտնաբերվել, իսկ մի բնակարանում էլ՝ 26-ամյա աղջկա դի, եւ մեկ այլ բնակարանում էլ 27-ամյա անգիտակից տղամարդ: Ինչու է անհրաժեշտ նմանատիպ լուրեր տարածելը, դժվար է ասել:

ՀՀ քաղաքացին առավոտյան իմացավ նաեւ, որ Լարսում 280 բեռնատար է կուտակվել:

Եւ իհարկե, ՀՀ քաղաքացին անհամբեր սպասելու էր, թե երբ է Մերի Մակարյանը հանդիպելու Մելանի Բիին: Եւ ահա, մենք իմացանք, որ հանդիպումը կայացել է, բայց թե ով է Մերի Մակարյանը, շատերն այդպես էլ չիմացան:

Եւս մեկ կարեւոր տեղեկություն: Պարզվում է երթուղայինների վարորդներին երջանիկ լինելու համար հազար դրամ չէր հերիքում: Գծատերերը իջեցրել են գումարը հազար դրամով եւ գործադուլն ավարտվել է: Իսկապես, հազար դրամով կարելի է գնել 250 գրամ միս:

Բնականաբար, հայ հանրությանը հետաքրքրում էր, թե ինչ է նվիրելու Քարդաշյանն իր երեխայի փոխնակ մորը: Հիմա արդեն գիտենք:

Իսկ դաշնակցականները ոչ պաշտոնական հանդիպում են ունեցել նախագահի թեկնածու Արմեն Սարգսյանի հետ եւ եկել այն եզրահանգման, որ բավական հետաքրքիր թեկնածու է: պատկերացնում եք, եթե հանկարծ անհետաքրքիր թեկնածու առաջադրվեր: 

Լրատվամիջոցները հարկ են համարել հայ հանրությանը տեղեկացնել Լուսինե Թովմասյանի երեխայի «արկածների» մասին, եւ որ Արմինկան վայելում է անձնական կյանքը:

Այսօր մենք իմացանք նաեւ, որ Արմեն Սարգսյանը կրկին մեկնել է Լոնդոն, եւ որ լոռեցի փաստաբանները գործադուլ են անում: Եւ ամենակարեւորը, պարզվում է «Ելքը» բավական լավ է վերաբերվում Արմեն Սարգսյանին:

Ավելորդ է նշել, բայց այսօր եւս հայ հանրությունը սպասում էր տեղեկությունների Հենրիխ Մխիթարյանի տրանսֆերի վերաբերյալ: 

Եւ եթե մի փոքր ուշադիր լինեք, ապա կհասկանաք, որ Հայաստանում, ըստ էության, այսօր որեւէ նշանակալի իրադարձություն տեղի չի ունեցել, իհարկե, բացի Մերի Մակարյանի հանդիպումից:

Հակոբ Ասատրյան

Top-News.am