Ինֆանտինոյի «մեծ գործարքը» տապալվեց

ՖԻՖԱ-ի նախագահ Ջաննի Ինֆանտինոյի շուրջ սկանդալը նոր փուլ է մտնում։ Հյուսիսային Եվրոպայի վեց ֆուտբոլային ասոցիացիաներ հայտարարել են՝ կորցրել են վստահությունը ՖԻՖԱ-ի նախագահի նկատմամբ։ Իսկ ՈւԵՖԱ-ի նախագահ Ալեքսանդր Չեֆերինը չի բացառում, որ 2027–ին՝ կառույցի նախագահի ընտրություններին, այլ թեկնածու կհայտնվի։

ՖԻՖԱ-ի նախագահի շուրջ դժգոհությունը սկսվեց մի նախաձեռնությունից, որը պետք է կազմակերպությանը հսկա գումար բերեր, բայց ավարտվեց ղեկավարության նկատմամբ վստահության ճգնաժամով։ Հուլիսի վերջին ՖԻՖԱ-ն առաջարկեց ստեղծել նոր առևտրային կառույց՝ FIFA Forward Enterprise։ Այն պետք է միավորեր ՖԻՖԱ-ի խոշոր մրցաշարերի, այդ թվում Աշխարհի առաջնության առևտրային իրավունքներն ու օպերացիոն կառավարումը։ Նախատեսվում էր նոր կառույց ներգրավել մինչև 4 մլրդ դոլարի մասնավոր կապիտալ՝ վաճառելով մոտ 20 մլրդ դոլար գնահատված կառույցի մինչև 20 տոկոս բաժնեմասերը։ Առաջատար ներդրողներից մեկը պետք է լիներ Ջոշուա Քուշների Thrive Capital-ը․ նա ԱՄՆ նախագահ Դոնալդ Թրամփի փեսա Ջարեդ Քուշների եղբայրն է։ ՈւԵՖԱ-ի նախագահ Ալեքսանդր Չեֆերին․

«FIFA Forward Enterprise-ը իրականում առաջարկ է։ Այն ժողովրդավարական գործընթացի՝ խորհրդակցությունների գործընթացի մի մասն է։ Եվ ամենակարևորը՝ այն հնարավորություն է, այլ ոչ թե պարտավորություն»։

ՖԻՖԱ-ն պնդում էր, որ սա մասնավորեցում չէ, և որ կազմակերպությունը պահպանելու է վերահսկողությունը։ Բայց հենց մասնավոր ներդրողների ներգրավումը մեծ դիմադրություն առաջացրեց եվրոպական ֆուտբոլում։

ՈւԵՖԱ-ն ու մի շարք ազգային ֆեդերացիաներ մտավախություն ունեին, որ մասնավոր կապիտալը կարող է էապես ազդել ՖԻՖԱ-ի ամենաարժեքավոր մրցաշարերի վրա։ Որոշ ասոցիացիաներ նույնիսկ քննարկում էին ՖԻՖԱ-ի մրցաշարերի բոյկոտը։ Ծրագիրն ի վերջո չեղարկվեց։ Ըստ հրապարակումների՝ առանցքային ներդրող Thrive Capital-ը դուրս էր եկել գործընթացից, որից հետո FIFA Forward Enterprise-ը տապալվեց։ Բայց դրանով պատմությունը չավարտվեց։

Օգոստոսի 23-ին Հելսինկիում հանդիպելուց հետո Դանիայի, Ֆինլանդիայի, Իսլանդիայի, Նորվեգիայի, Շվեդիայի և Ֆարերյան կղզիների ֆուտբոլային ասոցիացիաները հայտարարեցին, որ կորցրել են վստահությունը Ինֆանտինոյի նկատմամբ։ Նրանք պահանջում են երաշխիքներ, որ ՖԻՖԱ-ի կառույցներ ու մրցաշարեր երբեք մասնավոր ներդրողներ չեն ներգրավվի և պահանջում են անկախ ուսումնասիրություն՝ գնահատելու կազմակերպության կառավարման թափանցիկությունը։  

ՈւԵՖԱ-ի նախագահ Ալեքսանդր Չեֆերինն ավելի կոշտ է արտահայտվել․ «Երկու տարբերակ կա։ Առաջինն այն է, որ նա գիտակցի՝ չունի ֆուտբոլային հանրության, երկրպագուների, խաղացողների, նախկին խաղացողների ու մարզիչների աջակցությունը։ Իսկ երկրորդն այն է, որ նա մասնակցի մարտին անցկացվելիք ընտրություններին, սակայն այդ դեպքում, կարծում եմ, մեկ այլ թեկնածու էլ կլինի։ Դեռ չգիտեմ՝ ով»։

Չեֆերինը Ինֆանտինոյի նախաձեռնությունը համեմատել է նաև Եվրոպական Սուպերլիգայի ձախողված նախագծի հետ՝ այս գաղափարը նույնիսկ ավելի վատը համարելով․

«Երբ դուք սկզբում համեմատեցիք այս և Սուպերլիգայի ծրագիրը, կարծում եմ՝ սա նույնիսկ ավելի վատն է, քան Սուպերլիգայինը։ Շատ կարևոր ակումբներ ցանկանում էին ստեղծել սեփական լիգան, ինչը սխալ է և կկործաներ ֆուտբոլը։ Սակայն այս դեպքում ֆուտբոլը բառացիորեն կվաճառվեր»։

Չեֆերինը հայտարարել է, որ ինքը չի առաջադրվի ՖԻՖԱ-ի նախագահի պաշտոնին։ Բայց Դանիայի ֆուտբոլային միությունն արդեն ասում է՝ Ինֆանտինոյին փոխարինող է փնտրում։ Մեջբերում․

«DBU-ն ՈւԵՖԱ-ի և մեր միջազգային գործընկերների հետ համատեղ կապահովի, որ 2027-ի ընտրություններին անդամ ասոցիացիաներն ունենան իրական ընտրության հնարավորություն և վստահություն ներշնչող այլընտրանք, որը կարողանա միավորել ՖԻՖԱ-ն տարբեր կոնֆեդերացիաների մակարդակով և վերականգնել խաթարված վստահությունը»։

Ինֆանտինոն, սակայն, մտադիր է պայքարելու ՖԻՖԱ-ի նախագահի պաշտոնը չորրորդ անգամ զբաղեցնելու համար։ Առայժմ այլ թեկնածուի անուն պաշտոնապես չի հայտարարվել։

armradio.am