ՀՀ դեսպանն ընդդեմ Հայաստանի կամ ճակատագրի հեգնանք «Կողմ» սահմանադրությանը` «դեմ» երկրին

«Ցախավելների հեղափոխության» լեգենդար առաջնորդ, իշխանությունների հորդորով սահմանադրական փոփոխություններին «կողմ» քվեարկած եւ որպես փոխհատուցում դեպան նշանակված Ալեքսանդր Արզումանյանը կարող է շահել իր դատական հայցն ընդդեմ Հայաստանի։

Հունվարի 11-ին Մարդու իրավունքների եվրոպական դատարանը կհրապարակի հերթական վճիռն ընդդեմ Հայաստանի Հանրապետության։
Այս ամենը կարող էր շատ նորմալ ընկալվել, եթե դիմումատուն չլիներ Դանիայի Թագավորությունում Հայաստանի արտակարգ եւ լիազոր դեսպան Ալեքսանդր Արզումանյանը:

Ոմանք կշտապեն ասել, որ Արզումանյանը դատարան հայց է ներկայացրել տարիներ առաջ՝ մինչեւ դեսպան նշանակվելը, բայց նույն դիմումատուն դեսպան նշանակվելուց հետո կարող էր հետ վերցնել դիմումը, չխայտառակելով ոչ իրեն, ոչ մեր երկիրը:

Դժվար թե աշխարհում մեկ այլ երկիր լինի, որի դեսպանը ՄԻԵԴ-ում հայց ներկայացնի իր երկրի դեմ: Այո, մեր անլրջությունը նաեւ հասել է այս մակարդակին:

Այս խայտառակությունը հուշում է, որ վաղուց արդեն ժամանակն է, որ սթափվենք, կանգ առնենք, դադարեցնենք այս անլրջությունը, որը մեր երկրին ծանրագույն վնաս է հասցնում:

Որպես Արտաքին գործերի նախկին նախարար եւ «Քաղաքացիական անհնազանդություն» շարժման առաջնորդ Ալեքսանդր Արզումանյանը բողոքարկում է իրեն կալանքի տակ պահելու հանգամանքը՝ «Փողերի լվացման» հայտնի գործով։

Հիշեցնենք, որ Ալեքսանդր Արզումանյանը ձերբակալվել էր 2007 թվականի մայիսին եւ կալանավորվել ապօրինի եկամուտների օրինականացման կասկածանքով։

Ալեքսանդր Արզումանյանը համարում է, որ խախտվել են Ազատության եւ անձնական անձեռնմխելիության, ողջամիտ ժամկետում դատական քննության իրավունքները։

Գուցե դեսպան նշանակվելուց էլ նա համոզված էր, որ խախտել են իր իրավունքները, բայց այդ դեպքում նա պետք է հրաժարվեր դեսպանի պաշտոնից, իսկ եթե եկել է այն համոզման, որ ամեն ինչ ճիշտ է եղել, ապա պետք է հետ վերցներ հայցը եւ նոր դեսպան նշանակվեր: Եւ եթե անգամ համոզված է, որ խախտվել են իր իրավունքները, բայց ներել է իրեն ապօրինի կալանքի տակ պահողներին եւ որոշել ծառայել պետությանը, ապա դեսպան նշանակվելուց առաջ կրկին պետք է հետ վերցներ հայցը, որ չլիներ այս անհեթեթ եւ անեկդոտային, եւ միաժամանակ շատ տխուր պատմությունը:

Տարօրինակ մարդ է Ալեքսանդր Արզումանյանը. մեկ դեմ է, մեկ կողմ, մեկ դատի է տալիս երկրին, մեկ այդ երկրի դեսպան նշանակվում: Գուցե ժամանակներն են այդպիսին, բայց այս ամենից մեր երկրի վարկն է ընկնում:

Հակոբ Ասատրյան

Top-News.am