Մահացել է «Կնքահայրը» և «Ապոկալիպսիս hիմա» ֆիլմերի դերասան Ռոբերտ Դյուվալը

Օսկարակիր ամերիկացի դերասան Ռոբերտ Դյուվալը մահացել է 95 տարեկան հասակում, հայտնել է նրա կինը՝ Լուսիանա Դյուվալը։ Դերասանը մահացել է Վիրջինիա նահանգի Միդլբուրգ քաղաքում գտնվող իր տանը կիրակի՝ փետրվարի 15-ին: Դյուվալն առավել հայտնի է «Կնքահայրը» և «Կնքահայրը 2» ֆիլմերում իր դերերով, որտեղ նա խաղացել է Թոմ Հագենի՝ Կորլեոնե ընտանիքի խորհրդականի և փաստաբանի դերը, և «Ապոկալիպսիսը հիմա» ֆիլմերում, որտեղ հանդես է եկել փոխգնդապետ Քիլգորի դերում, ով հայտնի է իր խոսքերով. «Ես սիրում եմ առավոտյան նապալմի հոտը»:

Ռոբերտ Դյուվալը ծնվել է Սան Դիեգոյում, Կալիֆոռնիա, սովորել է Իլինոյսի Պրինսիպիա քոլեջում և Կորեական պատերազմի ժամանակ ծառայել է բանակում։ Այնուհետև նա տեղափոխվել է Նյու Յորք, որտեղ դերասանական վարպետություն է սովորել ազդեցիկ ուսուցիչ Սանֆորդ Մեյսների մոտ։ Նա բնակարան է կիսել Դասթին Հոֆմանի հետ և շփվել է Ջին Հեքմանի հետ։ 

Լարի Քինգին տված հարցազրույցում դերասանը բացատրել է «Կնքահայր» ֆիլմի երրորդ մասում նկարահանվելուց հրաժարվելու իր որոշումը նրանով, որ Ալ Պաչինոն (Մայքլ Կորլեոնե) պետք է հինգ անգամ ավելի շատ վարձատրություն ստանար, քան առաջարկվում էր իրեն, ինչը «բոլորովին անընդունելի» էր։ «Բոլորը դա անում էին փողի համար»,- պնդում էր նա։ 

Դյուվալը «Օսկար» մրցանակի է արժանացել «Լավագույն դերասան» անվանակարգում՝ 1983 թվականի «Նուրբ ողորմություն» ֆիլմում իր դերի համար, որտեղ մարմնավորում էր ալկոհոլիկ քանթրի երգիչ Մաք Սլեգին։ Նա նաև առաջադրվել է «Օսկար»-ի՝ «Մեծ Սանտինի» (1979) ֆիլմում օդաչուի և «Կոպպոլայի Ապոկալիպսիսը հիմա» (1979) ֆիլմում փոխգնդապետ Բիլ Քիլգորի դերերի համար։

Դյուվալը նաև մարմնավորել է բազմաթիվ պատմական դեմքերի, այդ թվում՝ Կոնֆեդերացիայի գեներալ Ռոբերտ Է. Լիին («Աստվածներ և գեներալներ», 2003), Իոսիֆ Ստալինին HBO հեռուստաալիքի «Ստալին» (1992) հեռուստաֆիլմում և նացիստ ռազմական հանցագործ Ադոլֆ Այխմանին «Մարդը, որը գրավեց Այխմանին» (1996) ֆիլմում:

Դերասանը նաև ակտիվ հասարակական գործունեությամբ է զբաղվել։ Մասնավորապես, նա մասնակցել է Վիրջինիա նահանգի ԱՄՆ-ի քաղաքացիական պատերազմի զոհվածերի հիշատակի հուշարձանին հարակից կառուցվող սուպերմարկետի շինարարության բողոքական գործողություններին։

Ռոբերտ Դյուվալը հիմնադրել է «The Robert Duvall Children’s Fund» բարեգործական ֆոնդը, որը օգնություն է ցուցաբերում արգենտինացի երեխաներին։ Ֆոնդի միջոցներով Արգենտինայում կառուցվում են դպրոցներ և հիվանդանոցներ, նաև ֆինանսական աջակցություն է ցուցաբերում աղքատներին։ Բացի այդ ֆոնդի գործունեությունից, Դյուվալը և իր կինը մասնակցել են նաև այլ բարեգործական միջոցառումներին և կազմակերպություններին։