Kia-ն հետաձգել է իր նոր էլեկտրական սեդանի՝ EV4-ի վաճառքը

Kia-ն անսպասելիորեն հետաձգել է իր նոր էլեկտրական սեդանի՝ EV4-ի, վաճառքը ԱՄՆ շուկայում, չնայած այն ներկայացվել էր դեռ կես տարի առաջ և նախատեսվում էր վաճառքի դուրս բերել 2026 թվականի սկզբին՝ մոտ 35 հազար դոլար արժողությամբ, հաղորդում է Jalopnik-ը։

Ներկայումս նախագիծը նշվում է որպես «հետաձգված, մինչև հետագա ծանուցում», ինչը վկայում է էլեկտրամոբիլների շուկայի բարդ իրավիճակի մասին։

Ընկերությունը որոշումը բացատրում է «շուկայի պայմանների փոփոխությամբ», սակայն փորձագետները նշում են, որ մեծ դեր են խաղացել նաև բարձր ներմուծման մաքսավճարները՝ մասնավորապես 15 % հարկը Հարավային Կորեայում արտադրված մեքենաների համար։ Սա զգալիորեն ազդում է մոդելի ինքնարժեքի վրա՝ հատկապես ԱՄՆ տնտեսական քաղաքականության հաճախակի վերանայման ֆոնին։

Հետաքրքիր է, որ EV4-ը արդեն պատրաստ է արտադրության․ վերջերս այն նկատվել է Կալիֆորնիայի ճանապարհներին՝ ամերիկյան համարներով։ Kia-ի կայքերում այն ժամանակավորապես հանվել է «սպասվող մոդելներ» բաժնից, սակայն շարունակում է հիշատակվել ընկերության մամուլի նյութերում։

EV4-ը կառուցված է E-GMP հարթակի վրա՝ ինչպես EV6 և EV9 մոդելները, սակայն օգտագործում է 400 վոլտանոց համակարգ՝ 800-ի փոխարեն, ինչը այն դարձնում է ավելի մատչելի։ Մեքենայի մարտկոցը թույլ է տալիս լիցքավորվել 10-ից 80 %՝ կես ժամից պակաս ժամանակում, իսկ հայտարարված ընթացքը հասնում է մինչև 530 կմ։ Kia-ն նաև պատրաստել էր EV4 GT սպորտային տարբերակը՝ ավելի քան 400 ձիաուժ հզորությամբ։