Youtube-ի աստղ Կարո Այրումյանն առաջին անգամ մենահամերգ կունենա ԱՄՆ-ում՝ Հոլիվուդի հայտնի Dolby Theatre-ում

Հայ փոփ սենսացիա Կարո Այրումյանը պատրաստվում է առաջին անգամ իր հիթերը կատարել Լոս Անջելեսում։ Բլոգերի համերգը տեղի կունենա նոյեմբերի 8-ին՝ համաշխարհային ճանաչում ունեցող Dolby Theatre-ում, որտեղ Կարոն հանդես կգա կենդանի ելույթներով։

Ամենաերիտասարդ հայ մեգաաստղերից մեկը՝ Կարո Այրումյանը, գրավել է միլիոնավոր մարդկանց ամբողջ աշխարհում ոչ միայն իր հետաքրքիր տեսանյութերով, այլև յուրահատուկ ձայնով,  խարիզմայով և հիթային երգերով, որոնց թվում են՝ «Մի փորձիր», «Մոռանամ», «Նայիր լուսնին» և «Ուր ա էն միակը»։ Այս տարվա սկզբին Կարո Այրումյանը երկու անընդմեջ համերգ է ունեցել Կարեն Դեմիրճյանի անվան մարզահամերգային համալիրում, որոնց տոմսերը վաճառվել են սեղմ ժամանակում՝ հավաքելով ավելի քան 20,000 երկրպագուների՝ ռեկորդ, որը ամրապնդեց նրա կարգավիճակը որպես Հայաստանի ամենապահանջված երիտասարդ կատարողներից մեկը։

Դոլբիում անցկացվող գիշերը խոստանում է անմոռանալի փորձառություն լինել՝ կենդանի նվագախմբի կատարմամբ, գերժամանակակից լուսային շոուով և Character Dance Studio-ի ելույթներով, ինչպես նաև զվարճալի անակնկալներով՝ երեխաների, մեծահասակների և ամբողջ ընտանիքի համար։

«Ես անչափ ուրախ եմ վերջապես ելույթ ունենալ Լոս Անջելեսի իմ երկրպագուների համար»,-ասում է Կարո Այրումյանը,-«Այս համերգը շատ բան է նշանակում ինձ համար. այն լինելու է երաժշտության, սիրո և կապի տոնակատարություն ամբողջ ընտանիքի համար»։