Ռուբիոն հաջորդ շաբաթ ռուս պաշտոնյաների հետ կքննարկի Թրամփ-Պուտին հանդիպման մանրամասները

ԱՄՆ պետքարտուղար Մարկո Ռուբիոն ռուս պաշտոնյաների հետ կքննարկի ԱՄՆ և Ռուսաստանի նախագահներ Դոնալդ Թրամփի և Վլադիմիր Պուտինի միջև Բուդապեշտում հաջորդ շաբաթ կայանալիք հանդիպման օրակարգը, հաղորդում է The Washington Post (WP)-ի սյունակագիր Դեյվիդ Իգնատիուսը՝ հղում անելով իր սեփական աղբյուրներին։

«Սպիտակ տան ռազմավարությունն այն է, որ պետքարտուղար Մարկո Ռուբիոն հաջորդ շաբաթ ուղարկվի ռուս պաշտոնյաների հետ հանդիպման՝ Բուդապեշտի գագաթնաժողովի օրակարգը քննարկելու համար, բացատրել է բանակցություններին մոտ կանգնած աղբյուրը»,-նշել է հրատարակությունը։

Հոդվածի հեղինակը նշում է, որ Ռուբիոն կարող է Ռուսաստանին առաջարկել տարբեր տնտեսական խթաններ՝ որպես Ուկրաինայի հակամարտությունը լուծելու ապագա խաղաղության համաձայնագրի հետևանք։ Միևնույն ժամանակ, ամերիկյան կողմը պլանավորում է Կիևին ավելի մեծ հեռահարության զենք մատակարարելու և պատժամիջոցները խստացնելու սպառնալիքը որպես լծակ օգտագործել։