Ժողովրդին խաբելու նուրբ արվեստը

Ժողովրդին խաբում են անդադար: Իսկ ո՞վ է ժողովուրդը: Ժողովուրդը ես եմ, դուք եք, ձեր ազգականն ու բարեկամն է, ձեր մորաքրոջ տղան եւ հորաքրոջ աղջիկն է, ձեր դասախոսն ու ուսուցիչը, բժիշկն ու անգամ ատամնատեխնիկը: ժողովուրդ են տաքսիստները, վարսահարդարներն ու անգամ գրադարանավարները: Կարճ ասած, կիրառելով հին ու նոր տեխնոլոգիաները մեզ անդադար խաբում են կամ ուզում են խաբել: Իսկ անդադար չխաբվելու համար պետք է լինել ուշադիր եւ կրթված:

Եթե ուշադիր եւ կրթված լինեք, ապա կհասկանաք, որ աջ ու ձախ սեռական բնույթի հայհոյանքներ շաղ տվող, բայց շան բնից դուրս չեկող մեկը չի կարող լինել արդար, ազատ, ազնիվ ու ուժեղ, առավել եւս հավակնել զբաղվել քաղաքականությամբ: Ավելին, դուք կհասկանաք, որ նրան ընդհանրապես չպետք է լսեք:

Եթե ուշադիր լինեք, ապա երբ ձեզ կոչ են անում պայքարել, որ տրանսպորտում չվճարեք կամ քիչ վճարեք, ապա կտեսնեք, թե ովքեր են ասողները: Ասում են նրանք, ովքեր երբեք ոչ ավտոբուս են նստել, ոչ էլ մետրոպոլիտենից են օգտվել, ոչ էլ օգտվելու են: Իսկ երբ տեսնեք, ինքներդ ձեզ հարց կտաք՝ եթե այս տղաներն ու աղջիկները մեզ համար այսպես տառապում են, ապա ինչու ոչինչ չեն անում այն օլիգարխների դեմ, ովքեր իրենց բենզալցակայաններում պրեմիում եւ ռեգուլյար բենզինների տակ նույն բենզինն են վաճառում ու գրեթե նույն գնով կամ ինչու են այսքան չնչին վճարում իրենց մոտ աշխատողներին: 

Եթե մի փոքր ուշադիր լինեք, ապա Արցախի փրկիչներից սահուն ավտոբուսի կոնդուկտորներ դարձածներից կհարցնեք, թե ինչու ոչինչ չեք անում նրանց դեմ, ովքեր կարագի փոխարեն կարագանման մթերք են վաճառում եւ այն էլ շատ թանկ գնով: Կհարցնեք նաեւ, թե ինչու ոչինչ չեք անում թմրանյութերի վաճառքով զբաղվողների դեմ պայքարն ուժեղացնելու համար կամ ինչու ոչ մի անգամ չհիշեցիք պատերազմում վիրավորված տղերքին:

Կհարցնեք, թե ինչու Ավինյանի կոկորդից չեք բռնում Երեւանում խայտառակ կառուցապատում իրականացնելու համար: Կհարցնեք, թե ինչու ծպտուն չեն հանում, երբ բենզալցակայանները բնակելի շենքերի հարեւանությամբ են կամ դպրոցների կողքին:

Եթե մի փոքր ուշադիր լինեք եւ կրթված, ապա կբացականչեք, կասեք՝ փաստորեն դուք մեզ խաբում էիք, պարոն Ավինյան, փորձելով տրանսպորտի գինը հասցնել 300 դրամի, երբ հնարավոր էր անգամ աշխատել 150 դրամով:

Տրանսպորտը պայքարի համար ամենահեշտ վայրն է, տեղն է, քանի որ այն տեր չունի: Վարչախումբը իր ձեւով է այն օգտագործում, իսկ կարգին Հայկոն եւ նրա մրցակիցները՝ իրենց:

Մնում է հարցնել, թե Կարգին Հայկոյին, որը քաղաքական լուրջ հավակնություններ ունի՝ մի՞թե տրանսպորտից բացի այլ խնդիրներ ձեզ չի հուզում, օրինակ, արցախցիների մասին մտածո՞ւմ ես:

Դե թող փորձեն մտնել Երեւան սիթի ու ասեն, թե մենք կարագը գնում ենք հազար դրամով, դրամարկղում դնեն հազար դրամ եւ փորձեն կարագով դուրս գալ: Առնվազն ծեծ կուտեն: Գիտեն, դրա համար էլ չեն անում, իսկ ավտոբուսներում նրանց չեն ծեծելու եւ դուրս չեն շպրտելու:

Միշտ հարցնում եք՝ երբ է լավ լինելու: Լավ է լինելու, երբ կրթված լինեք ու միշտ զգոն ու ուշադիր: Այ, հենց զգոն լինեք, Երկրի թիվ մեկ օրակարգը չի գա ու հասնի 50 դրամին:

Հենց զգոն լինեք, այլեւս ձեզ ընտրություններից չեն խոստանա մետրոյի նոր կայարան կամ բարձր կենսամակարդակ: Թույլ մի տվեք, որ ձեզ խաբեն: Դա շատ վատ բան է, երբ սիրում եք լսել այն, ինչը հաճելի է, բայց ոչ ճշմարիտ:

Top-News.am