Porsche 911-ի սեփականատերն իր մեքենան ավելի քան 10 տարի չվերադարձրած մեխանիկից 130 հազար դոլար է կորզել

Լոնդոնի Կենտրոնական շրջանային դատարանի որոշմամբ Օքսֆորդի համալսարանի գիտաշխատող կինն իր մեխանիկի և Porsche 911-ներից մեկի վնասված նմուշօրինակին առնչվող տարօրինակ պատմության պատճառով ավելի քան 150 հազար դոլար փոխհատուցում է ստացել:

Ինչպես նշում է Daily Mail-ը, նեանդերթալցիների և միջին պալեոլիթի ժամանակաշրջանի բնագավառում մասնագիտացած դոկտոր Պենելոպա Հորլիքը նշանավոր համալսարանում աշխատում է 2003 թվականից։ 2008 թվականին նա ձեռք է բերել  3,6 լիտրանոց վեց մխոցանի M64 շարժիչով և Tiptronic ավտոմատ փոխանցման տուփով հագեցած 1997 թվականի Porsche 911 Targa մակնիշի ավտոմեքենա։

Օդով հովացվող սպորտային մեքենան երբեմն օգտագործվում էր Օքսֆորդ ուղևորությունների համար մինչև 2010 թվականի օգոստոսը, երբ Հորլիքը թաց ճանապարհի վրա ջրափոսը շրջանցելիս վթարի ենթարկվեց: Արդյունքում ավտոմեքենան յուղի արտահոսք է ունեցել և այլևս գործի չի գցվել։

Վթարից հետո գերմանական սպորտային մեքենան կարգի բերելու համար դոկտոր Հորլիքը դիմել է Ջալլի անունով մեխանիկի օգնությանը։ Ջալլին համաձայնել է կատարել վերանորոգման աշխատանքները՝ կնոջը մոտ 12 հազար դոլարի ծախս ներկայացնելով։ Սակայն հետագա 10 տարիների ընթացքում իր մեքենայի աշխատանքի վիճակի վերաբերյալ թարմ տեղեկություն ստանալու Հորլիքի փորձերը ծայրահեղ թշնամանքով են ընդունվել։ Հորլիքն հույսը վերջնականապես կտրելով՝ 2014 թվականին որոշել է փոխարինել իր սպորտային մեքենան և Audi մակնիշի ավտոմեքենա է գնել:

Սպորտային մեքենայի տերը իր Porsche-ն վերանորոգելու համար սկսել է այլ մեխանիկներ փնտրել, սակայն տարեց վարպետը հրաժարվել է մեքենան տիրոջը վերադարձնել։ 2022 թվականին դոկտոր Պենելոպա Հորլիքը դատի է տվել մեխանիկին, որը, ինչպես հետագայում պարզել է դատարանը, մեքենայի ապամոնտաժված կմախքը նետել է կնոջ տան դիմաց, իսկ ավտոմեքանայի թանկարժեք շարժիչն ու շարժահաղորդիչը՝ այլ հիմնական բաղադրիչների հետ միասին՝ յուրացրել:

Հորլիքը Ջալլիին պայմանագրի խախտման և վերահաստատման համար վնասի հատուցման համար հայց է ներկայացրել: Դատարանը կանգնել է գիտնականի կողքին՝ գործը վճռելով մեքենայի դժբախտ տիրոջ օգտին: Դատարանի վճռով գիտնականին 114 հազար ֆունտ ստեռլինգի (մոտ 152 հազար ԱՄՆ դոլար) չափով վնասի փոխհատուցում է տրամադրվել։