Հայկական ակումբային ֆուտբոլը պետք է ռեանիմացիայի ենթարկել

Գյումրիում տեղի ունեցած սկանդալային ծեծկռտուկից եւ ՀՖՖ կարգապահական կոմիտեի այդ առնչությամբ կայացրած ոչ պակաս խայտառակ որոշումներից հետո «Ալաշկերտի» եւ հայկական ակումբային ֆուտբոլի համար հուսադրող լուրեր են ստացվում: «Ալաշկերտ» ֆուտբոլային ակումբի պաշտոնական կայքէջը հայտնում է, որ այս տարվա դեկտեմբերից Հայաստանի չեմպիոնին հովանավորելու է հայտնի գործարար, «Տաշիր Գրուպ» ընկերության սեփականատեր Սամվել Կարապետյանը: Հնարավոր է, «Ալաշկերտ» ՖԱ-ն անվանակոչվի «Ալաշկերտ-Տաշիր»:

Սա հայկական ֆուտբոլի համար կարևոր իրադարձությունն է։ Մեծ հաշվով, ֆուտբոլը Հայաստանում այսօր մեռնում է՝ խիստ ցածր կարգի թիմեր եւ խիստ ցածր կարգի առաջնություն, դատարկ տրիբունաներ, անհեռանկարային երիտասարդ սերունդ։ Երիտասարդական թիմերը խայտառակ արդյունքները ուղղակի ահազանգ են։ Հենց երեկ Հայաստանի մինչեւ 19 տարեկանների հավաքականը 5:0 հաշվով խայտառակ պարտություն կրեց Չեխիայի հավաքականից: Արդեն սովորական է դարձել, որ մեր տարբեր տարիքային հավաքականները պարտվում են խոշոր հաշիվներով:

Ֆուտբոլը Հայաստանում կտրվել է ժողովրդից՝ 5-6 թիմ իրենց համար, դատարկ մարզադաշտերում պարբերաբար խաղում են, որոնցից երեքըն այսպես, թե այնպես հայտնվելու են եվրոպական գավաթների խաղարկության նախնական որակավորման փուլում, երաշխավորված պարտություն են կրելու։

Կարծում ենք, որ այս ներդրումից անուղակի կշահի հայկական ակումբային ֆուտբոլը: Մյուս ակումբները եւս ավելի կձգվեն, կփորձեն մեծացնել ներդրումները եւ մրցակցությունը թույլ կտա առաջնությունն ավելի հետաքրքիր դարձնել:

Շատ կարեւոր է, որ այս ներդրմանը հետեւի ֆուտբոլային քաղաքականության, ֆուտբոլային մենեջմենթի փոփոխությունը։ Ֆուտբոլը աճող, զարգացող բիզնես է աշխարհում, Հայաստանը չպետք է բացառություն լինի։ Հայաստանը չի կարող բացառությունն լինել, հակառակ դեպքում ֆուտբոլը մեր երկրում ուղղակի կվերանա։ Բակային ֆուտբոլի մակարդակից չի աճի։

Իսկ ինչ վերաբերում է «Ալաշկերտին», ապա վերջապես ժամանակն է, որ հայաստանյան գոնե մեկ թիմ Հայաստանն արժանապատվորեն ներկայացնի եվրոպական գավաթների խաղարկություններում: Մնում է, որ գումարները ծախսվեն նպատակային եւ խելամտության սահմաններում: Վեցից յոթ գոնե միջին կարգի ֆուտբոլիստների ձեռք բերումը թույլ կտա, որ «Ալաշկերտը» փորձի հայտնվել Չեմպիոնների կամ Եվրոպայի լիգայի խմբային մրցաշարերում:

Ինչպես արդեն շեշտեցինք, «Ալաշկերտի» վերելքը կստիպի առաջընթացի մասին մտածել մյուս ակումբներին, իսկ որ ամենակարեւորն է, ժամանակն է, որ մտածենք ֆուտբոլասերներին Հայաստանի առաջնության եւ գավաթի խաղարկության ժամանակ բերել մարզադաշտ: Համաձայնեք, որ առանց մարզասերների, դատարկ տրիբունաների առկայությամբ, ձգտում ավելի խաղ ցուցադրելու չի կարող լինել:

Մարզասերների ներկայությունը ոչ միայն ֆուտբոլիստներին կստիպի ավելի լավ խաղ ցուցադրել, այլ նաեւ բիզնես նշանակություն կունենա եւ վերջապես Հայաստանում թիմերը կունենան իրենց երկրպագուների բանակը, որոնք խաղերին կներկայանան սիրելի թիմի մարզաշապիկներով, շարֆերով:

Ամփոփելով ընդգծենք, որ անկախ ամեն ինչից, «Տաշիր Գրուպի» աջակցությունը «Ալաշկերտին» միայն ու միայն դրական նշանակություն է ունենալու, մնում է, որ այս օրինակը վարակիչ դառնա այլ մեծահարուստ հայերի համար, որոնք մեկական ակումբ հովանավորելով եւ հիմնելով հիմնովին կփոխեն հայկական ակումբային ֆուտբոլի ներկա տխուր իրավիճակը, երբ մի կերպ առաջնությանը մասնակցում է վեց թիմ:

Լինենք անկեղծ, նախկինում եւս եղել են դեպքեր, երբ այս կամ այն գործարարը փորձել է ներդրում անել այս կամ այն թիմում,բայց բախվելով տխուր իրականությանը, հիասթափվել են, նեղացել եւ հեռացել: Մնում է հուսալ, որ «Ալաշկերտի» հետ նույնը չի լինի եւ այս թիմի օրինակը, ընդհակառակը, վարակիչ կլինի մյուս թիմերի եւ այլ գործարարների համար: Հակառակ դեպքում Հայաստանի առաջնության ամենահետաքրքիր իրադարձությունները կլինեն ծեծկռտուկները եւ մարզիչների նկատմամբ հաշվեհարդարները, այնպես, ինչպես «Շիրակ»-«Ալաշկերտ» հանդիպման ժամանակ:

Հակոբ Ասատրյան

Այս թեմայով Փյունիկը ձեռքից բաց թողեց հաղթանակը Ուրարտուի դեմ խաղում Դիեգո Մարադոնա. Եթե չլինեին վնասվածքները, Ռոնալդոն կդառնար պատմության լավագույն խաղացողը «Բարսելոնան» եւ «Յուվենտուսը» կխաղան հաջորդ փուլում «Չելսին» չսիրեց Ադրբեջանի չեմպիոնին Կելտերի սխալը չներեցին փարիզցիները