Ստեփանակերտին մերձակա վառելիքի պահեստի պայթյունից զոհվել է 218, վիրավորվել 120, անհետ կորել 21 մարդ

Արցախի Պաշտպանության բանակի՝ Ստեփանակերտ-Ասկերան ավտոճանապարհին տեղակայված վառելիքի պահեստում 2023թ․ սեպտեմբերի 25-ին գրանցված պայթյունի հետևանքով զոհվել է 218 անձ, վիրավորվել՝ 120-ը, 21-ն անհետ կորած են։ Այս մասին Հանրային հեռուստաընկերությանը տված հարցազրույցում հայտնել է Քննչական կոմիտեի նախագահ Արգիշտի Քյարամյանը։

Նրա փոխանցմամբ՝ 3 դի մինչ այժմ չի նույնականացվել, ինչը վկայում է այն մասին, որ բոլոր տուժածների հարազատները չէ, որ գենետիկական փորձաքննության համար նմուշ են հանձնել։ «Պետք է խնդրեմ, որ բոլոր տուժածների հարազատները կապվեն վարույթն իրականցնող մարմնի հետ՝ հարցը կարգավորելու նպատակով»,- ասել է Քյարամյանը։

Նրա խոսքով՝ Քննչական կոմիտեն այս գործով վարույթը նախաձեռնել և իրականացնում է այն պատճառով, որ ընդհանուր իրավիճակը բխում է էթնիկ զտման իրողություններից։

«Եթե մարդիկ հարյուրներով կամ հազարներով առանց մեկը մյուսին հերթ տալու, գնացել, փորձել են օրհասական վառելիք ձեռք բերել, դա ցույց է տալիս, որ նրանք անելանելի վիճակում են եղել, ինչը վկայում է այն հոգեբանական վիճակի մասին, որում նրանք հայտնվել են Ադրբեջանի գործողությունների պատճառով։ Նման պայմաններում իրարանցումն անխուսափելի է»,- նշել է նա։

ՔԿ նախագահը հայտնել է, որ Պաշտպանության բանակը բառելիքի պահեստի կառավարումը՝ այդ թվում գրավոր հիմքով, հանձնել է Լեռնային Ղարաբաղի իշխանություններին, և դա տեղի է ունեցել սեպտեմբերի 19-20-ի ագրեսիայից հետո, ենթադրաբար՝ ՊԲ կազմալուծման գործընթացով պայմանավորված։

Արդյո՞ք տեղում անվտանգության կանոնների պահպանման և գործընթացի վերահսկման համար պատասխանատու անձինք են եղել՝ ՔԿ նախագահը չի հստակեցրել՝ նշելով, որ դեռևս քննություն է ընթանում։

Քյարամյանը հայտնել է, որ պահեստում պահվել է շուրջ 42 հազար տոննա վառելիք․ բռնկվել է միայն բենզինը՝ դառնալով պայթյունի պատճառ։

Այս թեմայով Որքա՞ն ժամանակ կպահանջվի՝ արցախցիներին բնակարանով ապահովելու համար․ Գեղամ Նազարյան Ադրբեջանի մշակութային ցեղասպանության հերթական զոհն է դարձել ազգային գործիչ Ալեք Մանուկյանի արձանը Այսօր Արցախյան շարժման 36-ամյակն է «Արցախի կորուստ, համազգային ճգնաժամ. գոյապայքար ՀՀ պետականության համար». կայացել է «Հայ դատն այսօր» 15-րդ խորհրդաժողովը Սեփական վայրագությունները դիմացի կողմին վերագրելն ադրբեջանական քարոզչամեքենայի գործելաոճն է