Արդյոք հնարավոր կլինի՞ համավարակը հաղթել պատվաստանյութերի միջոցով

2021 թվականին հազիվ թե հնարավոր լինի պատվաստանյութի միջոցով SARS-CoV-2 կորոնավիրուսի համավարակը հաղթել: Այսպիսի կարծիք են հայտնել Առողջապահության եւ բժշկական գիտությունների ավստրալական ակադեմիայի (AAHMS) մասնագետները: Մասնագետների խոսքով՝ համընդհանուր պատվաստումը երկար կտեւի, ուստի անհրաժեշտ է դիմել կորոնավիրուսի զսպման մյուս միջոցներին:

AAHMS-ը, որի մեջ մտնում են 400 առաջատար հետազոտողներ, հաշվետվություն է հրապարակել, որում շարադրել է կորոնավիրուսսի դեմ պայքարի հետագա գործողությունները, նշված է MedicalXpress-ի մամուլի հաղորդագրության մեջ: Չնայած պատվաստանյութերը 90 տոկոսանոց արդյունավետություն են ցուցադրել, դրանց արտադրությունը, փոխադրումը եւ կիրառումը մեծ ջանքեր ու ծախսեր կպահանջեն:

Բնակչության մեծ մասի պատվաստումն, ամենայն հավանականությամբ, հնարավոր կլինի միայն հաջորդ տարվա վերջին: Այս պատճառով գիտնականները պնդում են, որ անհրաժեշտ է հետեւել միջոցառումների մի ամբողջ համալիրի, որպեսզի կորոնավիրուսի տարածումը հաղթահարվի: Դրանց թվում է համընդհանուր թեստավորումը, ինքնամեկուսացումը, կարանտինը, սոցիալական հեռավորության պահպանումը, դիմակի կրումը, ինչպես նաեւ բուժումը եւ ճիշտ կազմակերպված պատվաստումը: