ՄԱԿ-ում կոչ են արել Թուրքիայի իշխանություններին դադարեցնել «վհուկորսը»
ՄԱԿ-ի մարդու իրավունքների հարցերով փորձագետների խումբը Թուրքիայի իշխանություններին կոչ է արել դադարեցնել «վհուկորսը» ու անհապաղ ազատ արձակել ինը իրավապաշտպաններին ու երկու օտարերկրացի փորձագետներին։ Նրանք կալանավորվել են ահաբեկչության մեջ կասկածանքով սեմինարի ժամանակ։ Ձերբակալվածներից է նաեւ Թուրքիայում Amnesty International կազմակերպության տնօրեն Իդիլ Եզերը։
ՄԱԿ հատուկ զեկուցողները մտահոգված են այն հաղորդագրություններով, որ իրավապաշտպանների դեմ իրականացվում է գաղտնի հետաքննություն, ընդ որում պաշտպանությունը հնարավորություն չունի ծանոթանալ ձերբակալվածների գործերին, հայտնում է ՄԱԿ-ի լրատվական կենտրոնը։
Անկախ փորձագետները նշել են, որ Թուրքիայում մարդու իրավունքներին առնչվող իրավիճակը անշեղորեն վատանում է։ Ահաբեկչության մեղադրանքով կալանավորված է մի քանի հազար մարդ, այդ թվում քաղաքական ակտիվիստներ, իրավաբաններ ու լրագրողներ, որոնք քննադատաբար են տրամադրված իշխանությունների հանդեպ։ Հատուկ զեկուցողների խոսքով կառավարությունը արդարացնում է այդ կալանավորումները անվտանգության նկատառումներով ու հերթական հեղաշրջումը կանխելու անհրաժեշտությամբ։ Իրականում, շեշտում են փորձագեները, նման միջոցառումները սահմանափակում են տեսակետների արտահայտման, խաղաղ հանրահավաքների ազատությունը։
Հատուկ զեկուցողները դիմել են ՄԱԿ մարդու իրավունքներով խորհրդին՝խնդրելով քննարկել իրավիճակը Թուրքիայում, որը բոլոր նշաններով ավելի է վատանալու։