Նյու Յորքում աճուրդի կհանվի տիրանոզավրի լրիվ կմախքներից մեկը

Նյու Յորքում Christie's աճուրդի տանը վաճառքի կհանվի տիրանոզավրի (գիշատիչ հսկամողես, որն ապրել է Երկրի վրա մոտ 67 մլն տարի առաջ) լրիվ կմախքներից մեկը, գրում է NYT-ը՝ նշելով, որ մինչեւ աճուրդի անցկացումը, որը նախատեսված է հոկտեմբերի 6-ին, կմախքը կցուցադրվի Մանհեթենում:

Ըստ փորձագետների գնահատումների՝ լոտը կարող է վաճառվել 6-8 մլն դոլարով:

188 ոսկորներով լրիվ կմախքը հայտնաբերվել է 1987 թվականին Հարավային Դակոտայում սիրողական հնէաբան Սթեն Սեքրիսոնի կողմից, հաղորդում է ՏԱՍՍ-ը:

Փորձագետների խոսքով՝ տիրանոզավրը կշռել է 7-8 տոննա՝ գրեթե 2 անգամ ավելի շատ, քան աֆրիկյան փիղը, դրա ատամները եղել են երկարությամբ ավելի քան 27 սմ: