Պայքարելու ենք մինչև վերջին գյուլենականին չեզոքացնելը. Թուրքիայի վարչապետ
Թուրքիայի վարչապետ Բինալի Յըլդըրըմն անցյալ տարվա հուլիսի 15-ին տեղի ունեցած ռազմական հեղաշրջման փորձի մեկամյակի նախաշեմին լրագրողներին տված հարցազրույցում հայտարարել է, որ երկրում արտակարգ դրությունը վերացնելու միտում մոտ ապագայում իրենք չունեն և պայքարելու են մինչև վերջին գյուլենականին չեզոքացնելը, գրում է թուրքական «Ջումհուրիյեթ» պարբերականը:
Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը ներկայում բնակվում է ԱՄՆ Փենսիլվանիա նահանգում:
«Գերմանիան միավորման ժամանակ 500.000 դավաճանի դուրս շպրտեց զբաղեցրած պաշտոններից: Եթե գիտես, որ ներսում դավաճան կա` ինչպե՞ս պետք է ղեկավարես երկիրդ», - հռետորական հարց է հղել Յըլդըրըմը:
Նա նաև հավելել է, որ Թուրքիայի ընդդիմությունը փորձում է պաշտպան կանգնել և արդարացնել գյուլենականներին, և մեղադրել է նրանց ահաբեկիչների հետ «ձեռք ձեռքի տալու» համար։