Հունաստանում 40 աստիճան շոգի երկրորդ ալիքն է սկսվել
Հունաստանում սկսվել է շոգի նոր ալիքը։ Երեք օր երկրի որոշ շրջաններում ստվերում օդի ջերմաստիճանը կլինի 40 աստիճան, իսկ երկրի մեծ մասում՝ 37-38 աստիճան։ Այս մասին հաղորդում է «ՌԻԱ Նովոստի»-ն՝ վկայակոչելով հունական օդերեւութաբանական ծառայությունը։
Ուրբաթ արդեն ջերմաստիճանը մի փոքր կնվազի, իսկ երկուշաբթի ցերեկային ժամերին այն կհասնի 30 աստիճանի։
Տաք օդը Հունաստան է «բերել» հակացիկլոնը Հյուսիսային Աֆրիկայից։ Չնայած այս անգամ ռեկորդային ջերմաստիճան չի սպասվում՝ իշխանությունները կոչ են անում խուսափել արեւից եւ ջերմային հարվածից խուսափելու վերաբերյալ խորհուրդներ են տալիս։
Հունաստանի մշակույթի ու սպորտի նախարարությունը հաղորդել է, որ շոգի հետ կապված կփոփոխվեն հնագիտական վայրերի աշխատանքային ժամերը։