Թրամփը հայտարարել է, որ հիացած է որդու ազնվությամբ
Միացյալ Նահանգների նախագահ Դոնալդ Թրամփը, անդրադառնալով ավագ որդու և Կրեմլի միջև հավանական կապի մասին սկանդալին, նշել է, որ որդին «բարձր կատեգորիայի մարդ է» և որ ինքը «հիացած է նրա բացությամբ»:
Համապատասխան հայտարարությունը Թրամփը տարածել է Սպիտակ տան մամուլի քարտուղարի առաջին տեղակալ Սառա Սանդերսի միջոցով՝ լրագրողների համար ճեպազրույցի ժամանակ:
«Որդիս բարձր կատեգորիայի մարդ է, և ես հիացած եմ նրա ազնվությամբ»,-մեջբերում է ԱՄՆ նախագահի խոսքը Politico հանդեսը:
Հիշեցնենք, որ նախօրեին The New York Times պարբերականը հայտնել էր, որ Դոնալդ Թրամփ-կրտսերը 2016թ. հունիսին Նյու Յորքում հանդիպել է ռուսական իշխանությունների հետ կապ ունեցող իրավաբան Նատալյա Վեսելնիցկայայի հետ:
Աղբյուրը մանրամասնում է, որ Թրամփ-կրտսերը համաձայնել էր հանդիպել ռուս իրավաբանի հետ, քանի որ իրեն խոստացել էին վարկաբեկիչ տեղեկություն տրամադրել այն ժամանակ ընթացող նախագահական մրցապայքարում Դոնալդ Թրամփի գլխավոր մրցակից Հիլարի Քլինթոնի վերաբերյալ:
Հայտնի է, որ Թրամփ-կրտսերը Twitter-ում հրապարակել է իր ու Վեսելնիցկայայի նամակագրությունը: