Սաակաշվիլին ասել է, որ չի վախենում Ուկրաինայի քաղաքացիությունից զրկվելուց
Վրաստանի նախկին նախագահ, Ուկրաինայի Օդեսայի նահանգի նախկին նահանգապետ Միխեիլ Սաակաշվիլին հայտարարել է, որ բնավ չի վախենում Ուկրաինայի քաղաքացիությունից զրկվելուց։ Այդ մասին նա ասել է «Ռուսթավի-2» հեռուստաալիքի եթերում, փոխանցում է ռուսական РИА Новости-ն։
«Դա ֆանտազիայի ոլորտից է: Եթե Ուկրաինայի իշխանություններն այդքան ուժ ունենային` այսօր ավելի լավ վիճակում կլինեին: Նրանք չունեն քաղաքական ռեսուրս, և բացի այդ` ես չեմ վախենում դրանից», - ասել է Սաակաշվիլին:
Նշենք, որ Սաակաշվիլին լքել է Վրաստանը 2013թ.-ին՝ նախագահ Գեորգի Մարգվելաշվիլիի պաշտոնավարման մեկնարկից հետո։
2015թ.-ին Ուկրաինայի նախագահ Պյոտր Պորոշենկոն նրան Ուկրաինայի քաղաքացիություն է շնորհել և նշանակել Օդեսայի նահանգապետ։
2016թ.-ին Սաակաշվիլին հեռացել է այդ պաշտոնից՝ հայտարարելով, որ Ուկրաինայի իշխանությունները չեն ցանկանում պայքարել կոռուպցիայի դեմ։