Թրամփը բացատրել է G20 գագաթնաժողովին իր դստեր ներկայությունը
ԱՄՆ նախագահ Դոնալդ Թրամփը պաշտպանել է դստերը՝ Իվանկա Թրամփին, որին քննադատել են G20-ի գագաթնաժողովի շրջանակում հանդիպումներից մեկի ժամանակ հոր տեղը զբաղեցնելու համար։ Այս մասին նա գրել է թվիթերում, հայտնում է Gazeta-ն։
«Երբ ես հեռացա դահլիճից՝ Ճապոնիայի ու մյուս երկրների առաջնորդների հետ հանդիպելու համար, ես Իվանկային խնդրեցի զբաղեցնել իմ տեղը։ Սովորական պրակտիկա Է։ Անգելա Մերկելը համաձայն է դրան»,- գրել է ԱՄՆ նախագահն իր թվիթերում։
Թրամփը նաեւ նշել է, որ եթե նման իրավիճակ լիներ Հիլարի Քլինթոնի դստեր՝ Չելսիի հետ, լրատվամիջոցները իրենց ֆեյքային նորություններում կգրեին «Չելսին նախագահի պաշտոնում»։
«Բարի լույս, պարոն նախագահ։ Երբեք նման բան չէր պատահի, որ իմ մայրը կամ հայրը ինձ նման բան խնդրեին։ Դուք մեր երկիրը մեկ ուրիշի՞ն եք հանձնել։ Հուսով եմ՝ ոչ»,- պատասխանել է Չելսի Քլինթոնը Թրամփին։