Համբուրգում շարունակվում է Մեծ քսանյակի գագաթնաժողովը

Համբուրգում շարունակվում է Մեծ քսանյակի գագաթնաժողովը, որին մասնակցում են աշխարհի ամենախոշոր տնտեսություններ ունեցող երկրների ղեկավարները։

Երեկ մեկնարկած հավաքի քննարկման հիմնական թեմաներն են ապօրինի ֆինանսական հոսքերի և ահաբեկչության դեմ պայքարը, նաև գլոբալ ջերմացումը, համաշխարհային տնտեսական աճն ու միգրացիոն ճգնաժամը:

Գագաթնաժողովի շրջանակում, հիշեցնենք, երեկ առաջին անգամ հանդիպեցին Միացյալ Նահանգների և Ռուսաստանի նախագահներ Դոնալդ Թրամփն ու Վլադիմիր Պուտինը: Երկու կողմերն էլ դրական են գնահատում ավելի քան երկու ժամ տևած բանակցությունները, որոնց ընթացքում Դոնալդ Թրամփն ու Վլադիմիր Պուտինը քննարկել են մի շարք թեմաներ, այդ թվում՝ Սիրիայի և Ուկրաինայի հակամարտությունները:

Հանդիպման ընթացքում երկու նախագահները մասնավորապես պայմանավորվել են Սիրիայի հարավարևմտյան մասում հրադադար հաստատելու շուրջ: Պայմանավորվածությանը միացել են նաև Իսրայելն ու Հորդանանը, որոնք ընդհանուր սահման ունեն Սիրիայի հետ: