Քաթարը շվեյցարական ընկերության հետ պայմանագիր է կնքել՝ իր քաղաքացիների շահերը պաշտպանելու համար
Քաթարի Մարդու իրավունքների ազգային կոմիտեն պայմանագիր է կնքել շվեյցարական Lalive իրավաբանական ընկերության հետ՝ արաբական մի շարք պետությունների կողմից շրջափակման արդյունքում տուժած իր քաղաքացիների շահերը պաշտպանելու համար:
Այն իրավաբանական ընկերությանն իրավունք է տալիս ուսումնասիրել շրջափակումից տուժած Քաթարի շուրջ 2450 քաղաքացիների եւ օտարերկրացի բնակիչների գործերը:
Զանգվածային հայցերի քննության մեջ մասնագիտացած Lalive ընկերությունը հայտարարել է, որ գործերով զբաղվելու է տեղական եւ միջազգային դատարաններում:
«Կատարի դեմ սահմանված պատժամիջոցները չեն համապատասխանում միջազգային իրավունքին: Քաթարի ընկերություններն ու շարքային քաղաքացիները չեն կարող թիրախ լինել»,- «Ալ Ջազիրա»-ին ասել է գործով առաջատար իրավաբան Վեյհո Հեյսկանենը:
Նշենք, որ 10 երկրներ, այդ թվում՝ արաբական 7 պետություններ, խզել են Կատարի հետ դիվանագիտական եւ առեւտրային հարաբերությունները՝ Դոհային մեղադրելով ահաբեկչությանը սատարելու մեջ: