Եվրոպայում բանկային քարտերը կփոխարինվեն մատանիներով

Մոտ ապագայում Եվրոպայի փողոցում սպիտակ մատանիներ կրող մարդկանց հնարավոր կլինի նկատել. Նիդերլանդական բանկն իր ծառայությունների վճարահաշվարկային նոր միջոց է փորձարկում:

Ինչպես ներկայացնում է Euromag-ը, Kerv բրիտանական ընկերության մտածած նոր վճարային համակարգը ենթադրում է սովորական մատանու մեջ միկրոչիպի տեղադրումը, որը համալրված կլինի տիրոջ բանկային հաշվի տվյալներով: Այդ միջոցով ծառայությունների և ապրանքների համար հնարավոր կլինի վճարել մեկ շարժումով` մոտեցնելով ձեռքը դրամարկղի մոտ գտնվող տերմինալին:

Աղբյուրի հաղորդմամբ` հաջող փորձարկումների դեպքում նորարար մատանիները կառաջարկվեն շահագրգիռ բանկերի հաճախորդ հանդիսացող ֆիզիկական անձանց: Բրիտանական ընկերության տվյալներով` նորույթն արդեն տասնյակ բանկային հաստատությունների է հետաքրքրել:

Վճարային նման համակարգի առավելությունը, ծրագրավորողների խոսքով, գործարքի լիակատար անվտանգությունն է: Փորձարկման շրջանում, այնուամենայնիվ, գնումների արժեքը կսահմանափակվի 50 եվրոյով:

tert.am