Արեւի լույսը ոչնչացնում է SARS-CoV-2 վիրուսը․ հետազոտություն

Ելնելով ԱՄՆ ներքին անվտանգության նախարարության մասնագետների ուսումնասիրությունից՝ արեւի լույսը ոչ միայն օգտակար վիտամին D-ի աղբյուր է, այլեւ ոչնչացնում է SARS-CoV-2 վիրուսը: Վիրուսը ոչնչացնելու արեւի ազդեցության տեւողությունը կախված է աշխարհագրական լայնությունից եւ օրվա ժամից: Հյուսիսային լայնության 40 աստիճանում կեսօրին, այսինքն դրա համար բարենպաստ միջավայրում վիրուսը գրեթե ամբողջությամբ ապաակտիվանում է 15 րոպեի ընթացքում, հայտնում է HighTech+-ը:

Նախորդ ուսումնասիրությունները ցույց են տվել, որ SARS-CoV-2-ը՝ COVID-19 առաջացնող վիրուսը, պլաստիկի եւ պողպատի վրա մնում է երեք օր, իսկ ստվարաթղթի վրա՝ 24 ժամ, եւ որ եղանակային պայմանները առանձնապես չեն ազդում տարածման վրա, եւ որ պաթոգենը կարելի է ապաակտիվացնել այն կես ժամով տաքացնելով մինչեւ 56°C կամ հինգ րոպե տաքացնելով մինչեւ 79°C։

ԱՄՆ կենսաբանական պաշտպանության վերլուծության եւ հակազդման ազգային կենտրոնի գիտնականները SARS-CoV-2-ի ուսումնասիրության արդյունքում եկել են նոր եզրակացությունների՝ արեւի լույսը զգալիորեն նվազեցնում է վիրուսի փոխանցումը արեւի ուղիղ ճառագայթների տակ գտնվող օբյեկտների միջոցով:

Փորձի ընթացքում հետազոտողները պողպատե վահանակների վրա վիրուսի նմուշներ են տեղադրել լամպերի տակ, որոնք նման են բնական լույսին: Արդյունքները ցույց են տվել, որ հյուսիսային լայնության 40 աստիճանի կեսօրին նման պայմաններում վիրուսի 90%-ը 6,8 րոպե հետո կորցնում է ակտիվությունը թքի մեջ, իսկ 14,3 րոպե հետո՝ մշակված միջավայրում, գրում է ZME Science-ը:

40-րդ զուգահեռականի վրա գտնվում են Իսպանիան, Պորտուգալիան, Իտալիան, Հունաստանը, Թուրքիան, Հայաստանը, Ադրբեջանը, Կենտրոնական Ասիան, Չինաստանը, Ճապոնիան եւ ԱՄՆ հարավային նահանգները:

Լույսի ավելի ցածր ինտենսիվության դեպքում նույնպես տեղի է ունենում ապաակտիվացում, բայց ավելի դանդաղ: Առանց արեւի լույսի ազդեցության պաթոգեն ակտիվությունը չի նվազում:

Արեւի լույսը պաշտպանում է կորոնավիրուսից եւս մեկ պատճառով` այն վիտամին D-ի բնական աղբյուր է, որը, բացի շատ առողջ հատկություններից, մեծացնում է վարակիչ հիվանդությունների հանդեպ դիմադրողականությունը։