Մոգերինի. ԵՄ-ն կոչ է անում Քաթարի ճգնաժամը կարգավորել երկխոսության միջոցով եւ առանց լարվածության
Եվրամիությունը տարածաշրջանի երկրներին կոչ է անում Քաթարի շուրջ ստեղծված ճգնաժամի կարգավորման համար ուղիղ բանակցություններ սկսել, լարվածությունը մեղմել եւ աջակցել Քուվեյթի միջնորդական ջանքերին: Այս մասին հայտարարել է ԵՄ դիվանագիտության ղեկավար Ֆեդերիկա Մոգերինին, փոխանցում է «ՌԻԱ Նովոստի»-ն:
«Մենք բոլորին կոչ ենք անում լարվածությունը մեղմել եւ ուղիղ երկխոսություն սկսել: ԵՄ-ն ուղղակիորեն շահագրգռված է Պարսից ծոցի երկրների միմյանց հետ համագործակցությամբ: Նրանք բոլորը մեր գործընկերներն են ահաբեկչության դեմ պայքարում, տնտեսության ոլորտում, նրանք նաեւ մեր գործընկերներն են տարածաշրջանային ճգնաժամերի կարգավորման փորձերում: Ցանկացած դժվարություն, ցանկացած լարվածություն, իսկ դա մշտապես առկա է, պետք է կարգավորվի բանակցությունների սեղանի շուրջ քննարկումների, երկխոսության, ընդհանուր միջոցների որոնման ճանապարհով եւ քաղաքական փոխգործակցության շրջանակում»,- լրագրողներին ասել է Մոգերինին: