Samsung-ը փակել է ծալովի հեռախոսների արտադրությունը

Samsung ընկերությունը ժամանակավորապես փակել է հարավկորեական Կումի քաղաքի իր գործարանը, որը ծալովի հեռախոսներ է արտադրում: Պատճառը աշխատակիցներից մեկի մոտ կորոնավիրուսի նշանների հայտնաբերումն է, հայտնում է Reuters-ը:

Գործակալության տեղեկություններով՝ գործարանի աշխատակցի մոտ կորոնավիրուսի ախտանշանները հայտնաբերվել են շաբաթ, նա եւ նրա գործընկերները կարանտինի են ուղարկվել: Samsung-ը միջադեպին արձագանքել է Կումիում գործարանը ժամանակավորապես փակելով: Հաղորդվում է, որ ընկերության սմարթֆոնների մեծ մասը հավաքվում է Վիետնամում եւ Հնդկաստանում, սակայն Կումիում է կենտրոնացած ծալովի Galaxy Z Flip-ի եւ Galaxy Fold-ի արտադրությունը:

Galaxy Z Flip ծալովի դեվայսը ստացել էր iFixit-ի մասնագետների ոչ միանշանակ գնահատականը, որոնք այն անվանել էին փոշեհավաք: Ավելի վաղ հաղորդվում էր, որ սարքի դիսփլեյը ճաքել է Մեծ Բրիտանիայում սարքի տիրոջ կողմից այն առաջին անգամ բացելիս:

Galaxy Z Flip սմարթֆոնը ներկայացվել է փետրվարի 11-ին Unpacked միջոցառման ժամանակ: Դեվայսն ունի 2 դիսփլեյ, որոնցից մեկն ունի Super AMOLED ճկուն մատրիցա եւ երկու մասի է ծալվում: