«Ոչ»-ի շտաբի նպատակը հանրաքվեի գործընթացը վերահսկելն է. Գոհար Մելոյան

 Աննախադեպ իրավիճակ է ստեղծվել, երբ քաղաքական ուժի դիմաց, որպես քարոզչական կողմ, հանդես է գալիս իրավական հանրությունը: Այս մասին Tert.am-ի հետ զրույցում ասաց սահմանադրագետ, սահմանադրական փոփոխությունների հանրաքվեի «Ոչ»-ի շտաբի նախաձեռնող խմբի ներկայացուցիչ Գոհար Մելոյանը՝ անդրադառնալով ապրիլի 5-ին կայանալիք սահմանադրական փոփոխությունների հանրաքվեին:

Սահմանադրագետն ընդգծեց, որ «Ոչ»-ի շտաբը քարոզչություն չի իրականացնելու: «Մենք իրավական հանրության ներկայացուցիչներ ենք: Չենք պատրաստվում «Այո» քարոզչական կողմի հետ քաղաքական դիսկուրսի մեջ մտնել: Մենք ևս, ինչպես մի շարք քաղաքական ուժեր, ընդունում ենք այս գործընթացի հակասահմանադրական և հակաիրավական բնույթը»,-ասաց Մելոյանը:

Ինչ վերաբերում է քարոզչության ընթացակարգին՝ սահմանադրագետը նշեց, որ «Ոչ»-ի շտաբը դեռևս ձևավորված օրակարգ չունի: «Որովհետև մեր հիմնական նպատակը բուն գործընթացի նկատմամբ վերահսկողություն իրականացնելն է, որն առավել հնարավոր է հանրաքվեին կողմ հանդիսանալու դեպքում, այսինքն՝ իրավական մեխանիզմներից օգտվելու հնարավորություն կա»,-պարզաբանեց նա՝ նշելով, թե վերահսկողություն են իրականացնելու, որպեսզի կանխեն հանրաքվեի ընթացքում հնարավոր խախտումները կամ դրանք լինելու դեպքում արձանագրեն և հետագայում բարձրաձայնեն բողոքարկման ենթակա խնդիրները:

«Ոչ»-ի շտաբի ձևավորման մյուս նպատակը, ըստ Մելոյանի, որպես հարթակ հանդես գալն է բոլոր այն ուժերի, քաղաքացիների, նախաձեռնությունների համար, որոնք կցանկանան դասական տեսանկյունից քարոզչություն իրականացնել:

Մելոյանի խոսքով՝ կարևորագույն մյուս նպատակը եղել է որպես կողմ ձևավորվել և փորձել զսպել անհանդուրժողականության այն մթնոլորտը, որն արդեն իսկ առկա է հասարակության մեջ, և որն այս քարոզչության ընթացքում կարող է ավելի մեծ զարգացում ապրել՝ կրկին մարդկանց պիտակավորելով, կողմերի բաժանելով:

Անդրադառնալով դիտարկմանը, թե «Այո»-ի շտաբը դրամահավաք-ճաշկերույթ է իրականացնում և հարցին՝ «Ոչ»-ի շտաբը նման նախաձեռնություն չունի՞, սահմանադրագետն արձագանքեց, որ այս պահին նման քննարկում և որոշում չունեն:

Մելոյանը նշեց նաև, որ արդեն իսկ նկատելի են «Ոչ»-ի շտաբն ինչ-որ ուժերի հետ ասոցացնելու փորձեր: «Մեզ կրկին փորձում են ներքաշել քաղաքական դիսկուրսի մեջ: Մեզ փորձում են ասոցացնել ինչ-որ ուժերի հետ. օրինակ՝ դեպք է գրանցվել, երբ լրագրողն էթիկայի շրջանակներից դուրս գնահատողական հարց էր ուղղել «Ոչ» քարոզչական կողմի լիազոր-ներկայացուցիչ Ռուբեն Մելիքյանին՝ նրան ասոցացնելով ՀՀ երկրորդ նախագահի հետ: Այդպիսի երևույթներն անթույլատրելի են»,-ասաց նա:

Հիշեցնենք, որ քարոզարշավը պաշտոնապես մեկնարկել է փետրվարի 17-ին և կավարտվի ապրիլի 3-ին:

Այս թեմայով Արտակարգ դրություն հայտարարվելու դեպքում ապրիլի 5-ի հանրաքվեն Սահմանադրության ուժով հետաձգվելու է. Գոհար Մելոյան Նման տեղեկություն ստանալիս անհապաղ դիմել իրավապահ մարմիններին եւ տեղեկացնել մեզ. Մելոյանը՝ ընտրակաշառք բաժանելու լուրին 3-րդ տարբերակ եղել է․ սահմանադրագետը հակադարձում է նախագահականին Պահանջված պարզաբանում ԱԺ իշխող խմբակցության շտապողականության վերաբերյալ. Գոհար Մելոյան