Գիտնականները ստեղծել են թեւնոց, որը կպաշտպանի գաղտնալսումից

Չիկագոյի համալսարանի գիտնականները ներկայացրել են նոր թեւնոց, որը ունակ է խլացնել օգտատերերի շուրջը գտնվող միկրոֆոնները։ Հետազոտողները կարծում են, որ էժանագին սարքը թույլ կտա պահպանել մասնավոր զրույցների գաղտնիությունը, հայտնում է HighTech-ը։

«Ներկա իրականության մեջ ցանկացած մարդու ձայնը շատ հեշտ է ձայնագրել, քանի որ ձայնագրող սարքերը մեր շրջապատում գնալով ավելանում են։ Մեր թեւնոցը օգտագար պաշտպանություն է անձնական տվյալների գրոհից։ Առայժմ այն կարելի է միայն ժամանակավոր օգտագործել՝ թեւնոցը պետք է ակտիվացնել, երբ ինչ-որ գաղտնի բան եք ուզում ասել։ Այդ ժամանակ սարքը կխլացնի օգտատիրոջ շուրջը գտնվող բոլոր միկրոֆոնները»,- նշել է Չիկագոյի համալսարանի դոցենտ Պեդրո Լոպեսը, ով աշխատում է նախագծի վրա։

Գիտնականները հենվում են National Public Media-ի տվյալների վրա, որոնց համաձայն, մեծահասակ ամերիկացիների 24 տոկոսն արդեն օգտագործում է սմարթ-դինամիկները, որոնք արտադրել են Amazon-ը եւ Google-ը։ Թեւնոցի cyberpunk նախատիպը կարելի է պատրաստել ընդամենը 20 դոլարով։

Մինչ շուկա հանելը գիտնականները ծրագրում են փոխել սարքի դիզայնը։ Առայժմ խոշոր սարքը հագեցած է 24 հաղորդիչներով, որոնցից յուրաքանչյուրը կոճակը սեղմելիս ուլտրաձայնային ազդանշաններ է ուղարկում բոլոր կողմեր։ Ձայնն աննկատելի է մարդու ականջների համար, սակայն միկրոֆոնները, որոնք կլինեն մոտակայքում, կձայնագրեն ոչ թե օգտատիրոջ խոսակցությունները, այլ բարձր հաճախականությամբ ձայներ եւ այլ աղմուկներ։