Nokia-ն կվերականգնի կուլտային սմարթֆոնը

Nokia-ն կարող է ներկայացնել N9 սմարթֆոնի թարմացված տարբերակը: Մշակման մասին հայտնել է MyDriver պարբերականը, հաղորդում է Lenta-ն:

Նշվում է, որ Nokia-ի կուլտային սմարթֆոնի վերականգնման մասին լուրերը հայտնվել են տարեսկզբին: Աղբյուրը կարծում է, որ թարմացված սարքը կունենա AMOLED-դիսփլեյ, երկակի տեսախցիկ եւ կարող է աշխատել Android տարբերակով: Ենթադրվում է, որ դեվայսը կստանա Nokia N9 Remastered Edition կամ Nokia N9 2020 անվանումը:

Հունվարի վերջին դիզայներ Էնթոնի Անդրեասը հրապարակել էր ապագա սարքի ռենդերները: Նրա վարկածով՝ N9-ը կստանա բարակ շրջանակներով եւ կլորացված ծայրերով դիսփլեյ: Անդրեասը ենթադրել է, որ սարքը կդառնա սմարթֆոններում դասական դիզայնի օրինակ:

2019 թվականի հունվարին հայտնի է դարձել N9 սմարթֆոնի հնարավոր վերականգնման մասին: ԶԼՄ-ների տեղեկություններով՝ սարքը պետք է ստանար ժամանակակից սարքերի ֆունկցիաներ, ներառյալ՝ Google Assistant ձայնային օգնականի աջակցություն:

2011 թվականին թողարկված N9-ը ընկերության առաջին սմարթֆոնն է Symbian օպերացիոն համակարգից Nokia-ի հրաժարումից հետո:

HMD Global կորպորացիան, որը տիրապետում է Nokia բրենդի իրավունքներին, արդեն վերաթողարկել է ընկերության այլ կուլտային սարքեր: 2017 թվականին թողարկվել է Nokia 3310 թարմացված տարբերակը, իսկ 2018 թվականին ներկայացվել է 8110 «հեռախոս-բանանը»: