Հալչող սառույցներում անհայտ հին վիրուսներ են գտել

ԱՄՆ եւ Չինաստանի գիտնականների միջազգային խումբը 15 հազար տարեկան սառույցի նմուշներում հայտնաբերել է նոր վիրուսներ։ Հետազոտողները նախազգուշացնում են, որ կլիմայի փոփոխությունը, որի պատճառով հալվում են սառցադաշտերը, կարող է մինչ այդ անհայտ վարակիչ գործակալներին շրջակա միջավայրում հայտնվելու ազատություն տալ, տեղեկացնում է Lenta-ն՝ հղում կատարելով Science Alert պարբերականին։

Մասնագետները երկու սառցակտոր են հանել՝ հորատելով 50 մետր տիբեթյան սառցադաշտում։ Միկրոկենսաբանական եւ գենետիկ վերլուծությունն օգնել է հայտնաբերել վիրուսների 33 խումբ, ներառյալ 28 անհայտ վիրուսներ։ Դրանցից 18-ը վարակում են մանրէներին, այդ թվում՝ Methylobacterium, Sphingomonas եւ Janthinobacterium։

Գիտնականների խոսքով՝ իրենց աշխատանքի արդյունքներն օգնում են միկրոօրգանիզմների եւ վիրուսների հետազոտման արդյունավետ մեթոդներ մշակել սառցադաշտային ծածկույթում։ Առաջին անգամ մասնագետները պատկերացում են կազմել վիրուսների գենոմների մասին, որոնք ապրել են 520 եւ 15 հազար տարի առաջ։

Հետազոտողներն ընդգծում են, որ գլոբալ տաքացումը կարող է հանգեցնել միկրոբային եւ վիրուսային տեղեկատվության կորչելուն, որով կարելի է վերակառուցել կլիմայի վիճակը հնում։ Բացի այդ, վարակիչ գործակալները կարող են ախտածին լինել ոչ միայն մանրէների, այլեւ կենդանիների ու մարդու համար։