Գիտնականները կարողացել են ծովի ջրից էլեկտրականություն արտադրել

ԱՄՆ-ից եւ Ավստրալիայից գիտնականներին հաջողվել է ստեղծել ամուր թաղանթ, որի օգնությամբ կարելի է ծովի ջրից էլեկտրականություն արտադրել։ Գաղափարը նոր չէ, սակայն դրա գործնական իրականացումը միայն այժմ է հաջողվել, գրում է Planet- today-ը՝ հղում կատարելով BBC Science Focus Magazine-ին։

Խոսքը օսմոսի՝ սահմանափակ ներթափանցմամբ թաղանթի միջով լուծիչի մոլեկուլների միակողմանի դիֆուզիայի հիման վրա էլեկտրականության արտադրության տեխնոլոգիայի մասին է։ Մոլեկուլները ձգտում են լուծված նյութի մեծ խտության կողմը եւ թույլ են տալիս մի քանի միջոցով էներգիա ստանալ։

«Միջոցներից մեկը ենթադրում է թաղանթի վրա ջրի ստեղծած ճնշումից էներգիայի ստացում։ Երկրորդ միջոցը թաղանթի միջով իոնների շարժումից հոսանքի ստացումն է։ Այս միջոցը լավ է համապատասխանում այն վայրերին, որտեղ ծովի ջրերը հանդիպում են գետի ջրերի հետ»,- պատմում են Միչիգանի համալսարանի աշխատակիցները։

Մինչ այժմ գիտնականներին չէր հաջողվում ստեղծել այնպիսի թաղանթ, որը չէր կորցնի իր հատկանիշները ծովի ջրի մեջ ընկղմելուց հետո։ Այժմ, երբ գիտնականները գործի են դրել հատուկ նանոթելեր, ամեն ինչ ստացվել է։ «Մենք ստեղծել ենք նոր սերնդի ճկուն եւ ամուր նյութ, որը մի քանի հարյուր ժամ ծովի ջրում մնալուց հետո էլ չի կորցնում իր յուրահատուկ հատկանիշները»,- նշում են նախագծի հեղինակները։