Տղաս հանգիստ մտավ Ֆանարջյանի անվան ուռուցքաբանության կենտրոնի տնօրենի սենյակ ու արյունոտ դուրս եկավ. պատմում է տուժածի բժիշկ հայրը (տեսանյութ)

Երևանի Ֆանարջյանի անվան ուռուցքաբանության ազգային կենտրոնում այսօր միջադեպ էր գրանցվել, ինչի հետևանքով նույն կենտրոնի վիրաբույժ, տնօրենի խորհրդական Վահագն Համբարձումյանը վնասվածքներով տեղափոխվել է «Աստղիկ» բժշկական կենտրոն։ Վահագն Համբարձումյանի հայրը՝ Գագիկ Համբարձումյանը Tert.am-ի հետ զրույցում պատմել է միջադեպի մասին։

«Սեպտեմբերի 30-ին ինձ կանչել են կենտրոն և ասել, որ հիվանդի հարազատներից բողոք կա, որի արդյունքում կան վիճահարույց հարցեր և, քանի որ վիճահարույց հարցեր կան, իմ հետ պայմանագիրը լուծարում են։ Տնօրենն ասաց ինձ, ես ասացի,որ դա այդպես հապճեպ անելու բան չէ, այո, լուծարում ենք, որովհետև հնարավոր չէ այդպես աշխատել և դուրս եկա։ Իմ տղան, ի դեպ, աշխատում է այս կենտրոնում, տնօրենի ԺՊ Նարեկ Մանուկյանն է հրավիրել։ Իմ տղան այլ բժշկական կենտրոնում է աշխատել, այստեղ հրավիրել են որպես տնօրենի արտաքին գործերի հարցերով օգնական-խորհրդատու և, իհարկե, վիրաբույժ։ Իմ տղան ու ես փորձում էինք երիտասարդ տնօրենին լինել օգնական։

Սեպտեմբերի 30-ից հետո սկսեցինք մեր իրերը հավաքել, ես որդուս ասացի, տնօրենն էլ էր ասել, որ շարունակում են աշխատել նորմալ ռեժիմով։ Վահագնը հանգիստ աշխատում էր՝ չնայած մեր դժվար իրավիճակին։ Անցավ մի քանի օր, հրաման չկա, իրերը հավաքում եմ, բայց հրամանը չկա»,-պատմեց Գագիկ Համբարձումյանը։

Նա ասաց, որ փորձել է ստանալ հրամանն ու պայմանագրի լուծման հիմքերը, սակայն կադրերի բաժնի վարիչը իր տղային ու իրեն հրամանի պատճեն է տվել, ոչ թե բնօրինակը, որը պարզել է տուն գալուց հետո։

Այսօր նա դրանք ստանալու գրավոր պահանջ է ներկայացրել, ի պատասխան՝ հայտնել են, որ բնօրինակը անձնական գործերում է գտնվում և պատճեն են տրամադրում, ինչը, Գագիկ Համբարձումյանի խոսքով, օրենքի սահմաններում չէ։ Նրան պատասխանել են, որ դա իրեն չեն կարող տրամադրել։

«Որդիս՝ Վահագնը ասաց, որ ճիշտ չի այդպես անել։ Որդիս տնօրենի դուռը բացեց, քարտուղարուհու հետ խոսեց, ասաց՝ հարցնեմ տնօրենին, թե ոնց է լինելու այդ հարցը, և գամ։ Երևի, մոտ 5-10 րոպե անց իմ տղային տեսնում եմ արյունոտված, գրգռված վիճակում, քիթը ջարդված, շեղված, այտուցված, և իմ ռեակցիան շոկային էր, բայց ես հուզականին չեմ տրվում։ Առաջին օգնություն ցույց տվեցինք, սենյակն արյան մեջ էր մինչև ոստիկանների գալը, դրանից հետո էլ, երբ զանգեցի ոստիկանություն, արյունը դադարեցրել ենք։ Տղայիս ձեռքին կար իմ՝ աշխատանքից ազատվելու մասին հրամանը՝ արյունոտ»։

Հարցին, թե ի՞նչ վիճակում է կենտրոնի տնօրենի ժամանակավոր պաշտոնակատար Նարեկ Մանուկյանը, Համբարձումյանն ասաց, որ լավ վիճակում է. «Վանսվածքներ չունի, շորերը ճղված չեն... երբ ոստիկաններն իջան՝ սենյակում զննում անելու, նա ինձ համար անհասկանալի ուրախ էր, որ կարողացել է տղավարի հարցերը լուծել, երևի թե, չնայած դա փողոց չէ»։

Գագիկ Համբարձումյանն ասաց, որ ինքը ցանկություն չի ունեցել դեպքի մասին խոսելու, սակայն անհասկանալի հրապարակում է լսել ու տեսել՝ իբր թե իր տղան սպառնացել է բժշկին։

«Իմ տղան ժպիտով, հանգիստ մտել է ներս։ Հիմա վիրահատվել է, վիճակը կայուն է, բայց ես կարող էի կորցնել տղայիս, հարվածներն այդպիսին են»։

Գագիկ Համբարձումյանն ասաց, որ եթե իր աշխատասենյակում սպառնացել են իրեն, կարող էր հրավիրել իրավապահներին, անվտանգության աշխատակիցներին, ոչ թե անցներ ձեռնամարտի. «Չեմ կարծում, որ այնպիսի վիճակ էր, որ գրասենյակը վերածեր փողոցի, իսկ ինչ վերաբերում է տնօրենի ԺՊ նամակին, ապա դա աշխատանքային ձև չի»։