«Պլուտոնը պետք է կրկին դասակարգվի որպես մոլորակ». ՆԱՍԱ-ի տնօրենը թեժացրել է ավելի քան տասնամյա վեճը

ԱՄՆ Օդագնացության և տիեզերական տարածության հետազոտությունների ազգային գործակալության՝ ՆԱՍԱ-ի ղեկավար Ջիմ Բրայդենսթայնը վերահաստատել է իր այն համոզմունքը, որ Պլուտոնը պետք է կրկին դասակարգվի որպես մոլորակ՝ այսպիսով նոր լիցք հաղորդելով ավելի քան մեկ տասնամյակ ձգվող քննարկումներին, գրում է բրիտանական Daily Mail պարբերականը:

Միջազգային աստղագիտական միության համագումարի 2006 թվականի որոշումից ի վեր, որի արդյունքում Պլուտոնը դուրս թողնվեց խոշոր մոլորակների ցանկից, աստղագետները և առաջատար գիտնականները երկար տարիներ վիճել են Պլուտոնի և նրա կարգավիճակի հետ կապված հարցի շուրջ։ Չնայած պաշտոնական որոշման առկայությանը՝ նույնիսկ 13 տարի անց շատերը հրաժարվում են ընդունել տվյալ պնդումը։

Բրայդենսթայնն իր հարցազրույցներից մեկում հայտարարել է, որ դեռևս խորապես համոզված է, որ Պլուտոնը պետք է դասակարգվի որպես լիարժեք մոլորակ, և շարունակելու է սատարել այդ գաղափարը:

Պլուտոնն Արեգակնային համակարգի գաճաճ մոլորակներից մեկն է։ Իր հայտնաբերման օրվանից՝ 1930 թ. մինչև 2006 թ., Պլուտոնը համարվում էր Արեգակնային համակարգի իններորդ, Արեգակից ամենամեծ հեռավորության վրա գտնվող մոլորակը։