10 000 ուսուցիչ կրճատելու վերաբերյալ քննարկում չի եղել, սակայն կրճատումներն անխուսափելի են

10 000 ուսուցիչ կրճատելու վերաբերյալ քննարկում չի եղել, մինչ օրս որևէ հարց չի բարձրացվել այդ մասին կառավարությունից և Ազգային ժողովում այդ հարցը չի քննարկվել ընդհանրապես: Այս մասին Tert.am-ի հետ զրույցում ասաց ԱԺ պատգամավոր, Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի անդամ Սոֆյա Հովսեփյանը:

«Բայց այն, որ ուսուցիչների կրճատման խնդիրն իրապես կա, դա փաստ է: Մարզերում շատ տարածված է այն երևույթը, որ մեկ դրույք աշխատանքի՝ այն էլ 22 ժամ, օրինակ՝ «Հայոց լեզու» կամ «Գրականություն» առարկայի դեպքում, տնօրենները նախկինում, նախկին վարչակարգի հետ համատեղ գումարներ վերցնելով՝ մեկ դրույքի վրա բերել են երկու կամ երեք մասնագետ: Եվ այսօր դպրոցներ կան, որ երեք նույն առարկայի մասնագետ 22 ժամի համար են աշխատում, այն էլ 8 ժամ առավելագույն ծավալով. այս դեպքում թերբեռնվածության խնդիր է առաջանում, այս դեպքում է միայն, որ պահանջվում է կրճատել ուսուցչին»,- պարզաբանեց պատգամավորը:

Սոֆյա Հովսեփյանը մանրամասնեց, որ սա չի վերաբերում «Քիմիա» և «Կենսաբանություն» առարկաներին. «Տվյալ դեպքում, այնուամենայնիվ, առավելագույն ժամը կարող է լինել փոքր դպրոցների համար 8 ժամը և այստեղ մեկ մասնագետ է, այդ մեկ մասնագետը չի կրճատվելու, սա թերբեռնվածության դեպք չի համարվելու: Այսինքն՝ խնդիրը բացառապես արհեստածին թերբեռնվածությա՞ն մասին է։ Եթե օրինակ՝ 8 ժամ «Քիմիայի» դասաժամ ունեցող դպրոցում կրկին կա երկու կամ երեք ուսուցիչ, սա իրապես մեծ խնդիր է առաջացնում: Այստեղ արհեստականորեն, կարծես թե, թույլ չի տրվում, որ մեկ մասնագետը նորմալ վարձատրվի»,- նշեց նա։

«Այս հարցը շատ վաղուց է քննարկվել, մինչև անգամ մեր իշխանության գալը: Այս հարցին ես՝ որպես կրթության փորձագետ, տիրապետում եմ, բայց մենք կրճատման հարց այս պահին չենք քննարկել»,– ավելացրեց նա:

Հարցին՝ արդյոք կարող է թիվ նշել, թե արհեստական գերբեռնվածությունը թոթափելու համար քանի հաստիք կկրճատվի, նա ասաց, որ հստակ թիվ ասել չի կարող: «Վերջին մեկ տարում այդ թիվը բավական փոփոխվել է: Այսինքն՝ մինչև հեղափոխությունն էլ բավականին շատ տնօրեններ, ֆինանսական խնդիրներից ելնելով, կրճատումներ էին արել. կազմակերպիչների, ջոկատավարների և այլ հաստիքներ են կրճատվել: Այսինքն՝ կրճատումներ եղել են թե՛ 2017 թվականին, թե՛ 2018-ին»,- նշեց նա:

Պատգամավորը նշեց, որ ներառական կրթության մասնագետների թիվն արհեստականորեն շատ մեծ էր: «Օրինակ՝ կային դպրոցներ, որ չունեին լոգոպեդ, երբ անհրաժեշտ էր, բայց ունեին 4 դաստիարակ, որի կարիքը չկա: Նմանատիպ արհեստածին բոլոր հաստիքները ժամանակին էլի ահագին թեթևացան: 2018-ին էլ է թեթևացել, իսկ հիմա կարծում եմ, որ պետք է համակարգային լուծում գտնել»,- նշեց նա:

Հարցին, թե սա նշանակո՞ւմ է, որ եթե դպրոցում կա, օրինակ՝ «Հայոց լեզվի» 3-4 ուսուցիչ, ապա պետք է մնա մեկը կամ երկուսը, նա պատասխանեց. «Ո՛չ: Դպրոցներ կան, որ կարող են ունենալ 5 «Հայոց լեզվի» ուսուցիչ և 5-ի կարիքն էլ լինի: Դրանք այն դպրոցներն են, որտեղ կան 1500–ից ավելի աշակերտ, որտեղ ծանրաբեռնվածությունը համապատասխանում է դասաժամերին: Իսկ այն դպրոցներում, որտեղ կա 60-ից 70 աշակերտ և այդ դպրոցում, ենթադրենք դասաժամերը առավելագույն թվով կազմում են 22 ժամ, որն ընդամենը մեկ ուսուցչի մեկ դրույքաչափի ծանրաբեռնվածություն է, և այդտեղ ունենք երեք ուսուցիչ, այս դեպքում պետք է կրճատի»:

Ի պատասխան հարցին, թե կա արդյոք մեխանիզմ, թե կրճատելիս, որ ուսուցչին է տրվելու նախապատվությունը, նա պատասխանեց. «Այս պահին հարցը չի քննարկվել, բնականաբար, մեխանիզմը չի էլ մշակվել, բայց եթե հարցը քննարկվի էլ, կարծում եմ՝ ուսուցչի մասնագիտական գիտելիքները հաշվի առնելով է կատարվելու կրճատումը»:

Բաժանորդագրվեք Top-News.am-ին Telegram-ում